بی آر ایس رکن کونسل کویتا کو عبوری ضمانت دینے سے سپریم کورٹ کا انکار

حیدرآباد،12 اگسٹ (ذرائع) سپریم کورٹ نے بی آر ایس رکن کونسل کویتا کو عبوری ضمانت دینے سے انکار کردیا۔ دہلی شراب پالیسی معاملہ میں گزشتہ کئی ماہ سے دہلی کی تہاڑ جیل میں مقید کویتا نے گزشتہ جمعہ کو سپریم کورٹ میں ضمانت کے لئے درخواست دائر کی تھی۔ سپریم کورٹ کی ڈیویژن بنچ جو جسٹس بی آر گوائی اور جسٹس وشواناتھ پر مشتمل تھی اس  نے آج ان کی درخواست پر سماعت کی۔ اس دوران بنچ نے کہا کہ اس کیس کے دیگر فریقین کے دلائل سنے بغیر عبوری ضمانت منظور نہیں کی جاسکتی۔ عدالت نے اس کیس کے فریقین کے طور پر شامل کئے گئے مرکزی تحقیقاتی ایجنسیاں‘ انفورسمنٹ ڈائرکٹوریٹ اور



سی بی آئی کو نوٹس جاری کرتے ہوئے جوابی حلفنامہ داخل کرنے کی ہدایت دی ہے۔ بتایا گیا ہے کہ کویتا کی جانب سے نمائندگی کرنے والے سینئر وکیل روہتگی نے عدالت سے درخواست کی کہ وہ اس کیس کی فوری سماعت کرے۔ انہوں نے بتایا کہ ان کی موکل کویتا گزشتہ پانچ ماہ سے جیل میں مقید ہے۔سی بی آئی اور ای ڈی نے ان کے خلاف درج مقدمات میں چارج شیٹ داخل کردی ہے۔ اب تک اس کیس کے سلسلہ میں سی بی آئی اور ای ڈی نے493افراد کے گواہوں سے پوچھ تاچھ کرتے ہوئے ان کے بیانات قلمبند کئے ہیں۔ واضح رہے کہ کویتا کو 15مارچ کو انفورسمنٹ ڈائرکٹوریٹ نے حیدرآباد سے گرفتار کیا تھا اور اس وقت وہ تہاڑ جیل میں مقید ہیں۔