نائیڈونے لاک ڈاؤن میں توسیع کی حمایت کی

نئی دہلی 14اپریل(یو این آئی)نائب صدر جمہوریہ ایم وینکیا نائیڈو نے لاک ڈاؤن کے دوسرے مرحلے کی حمایت کرتے ہوئے منگل کے روز کہا کہ باشندگان وطن کوتحمل اور عزم کے ساتھ کورونا وبا سے نمٹنے کے لئے حکومت کا ساتھ دینا چاہئے۔

مسٹر نائیڈو نے سوشل نیٹ ورکنگ ویب سائٹ فیس بک پر لکھے ایک پوسٹ میں کہا ہے کہ وزیر اعظم نریندر مودی نے ملک کے باشندوں کی حفاظت کے لئے لاک ڈاؤن کی مدت میں توسیع کرنے کا فیصلہ کیا ہے۔انہوں نے کہا کہ وزیر اعظم نے غریب اور محروم طبقے کے لئے مناسب انتظامات کرنے کا یقین دلایا ہے۔وزیر اعظم نے لاک ڈاؤن کی مدت بڑھانے کا فیصلہ ملک کے جذبات اور ضرورتوں کے مطابق کیا ہے۔یقیناً اس کے مثبت نتائج سامنے آئیں گے۔

مسٹر



نائیڈو نے امید ظاہر کی ہےکہ حکومت لوگوں کے دکھ درد کو دور کرنے کی پوری کوشش کرے گی۔غریبوں کی روزی روٹی کا خیال رکھا جائے گا اور انہیں کم سے کم نقصان ہونے دیا جائے گا۔حکومت کسانوں اور کھیت مزدوروں کا خیال بھی رکھے گی۔اور انہیں کام کرنے کے لئے مناسب رعایتیں مہیا کرائے گی۔

نائب صدر جمہوریہ نے کہا کہ اب یہ لوگوں کے ہاتھوں میں ہے کہ لاک ڈاؤن پر پوری طرح سے عمل کیا جائےاورمرضی کے مطابق نتیجے حاصل کئے جائیں۔کورونا کو ہرانے کے لئے لوگوں کا عزم اور تحمل ضروری ہے۔اچھے مستقبل کے لئے آج مشکلوں کا سامنا کرنا ہی ہوگا۔مسٹر نائیڈو نے کہا،’’آخر میں جیت ہماری ہی ہوگی لیکن اس کا انحصار لاک ڈاؤن کی مدت میں ادا کی گئی ذمے داریوں پر ہوگا۔‘‘