ساگرمالا پروجیکٹ ملک کی اہم بندرگاہوں کی ترقی کا انجن:سونوال

حیدرآباد 31مئی(یواین آئی) مرکزی وزیر بندرگاہیں سون بھدرسونوال نے کہا ہے کہ ساگرمالاپروجیکٹ کے تحت ملک میں بڑے پیمانہ پر بندرگاہوں کی ترقی کے کام کئے جارہے ہیں۔انہوں نے کل شب وشاکھاپٹنم میں میڈیا سے بات کرتے ہوئے کہا کہ ساگرمالا پروجیکٹ بندرگاہوں بالخصوص ملک کی اہم بندرگاہوں کی ترقی کا انجن ہے۔یہ پروجیکٹ ملک کی تیز ترترقی کے لئے شروع کیاگیا ہے۔وزیر موصوف نے کہا کہ حکومت نے پہلے ہی اس پروجیکٹ کیلئے 99ہزارکروڑروپئے صرف کردیئے ہیں اورساگرمالا کے تحت شروع کردہ 215پروجیکٹس مختلف مراحل میں ہیں۔انہوں نے کہاکہ تمام پروجیکٹس 2035تک مکمل کرلئے جائیں



گے۔انہوں نے نشاندہی کرتے ہوئے کہا کہ تمام اہم بندرگاہیں کارگوکے معاملہ میں بہتر مظاہرہ کررہی ہیں اورموجودہ طورپر بندرگاہوں سے آنے والے کارگو 105ملین ٹن ہوگئے ہیں۔تمام اہم بندرگاہوں کوبہترین ٹکنالوجی کا استعمال کرتے ہوئے عصری بنانے کا کام کیاجارہا ہے اور بندرگاہوں کا استعمال کرنے والوں کو بہتر سہولیات فراہم کی جارہی ہیں۔سونوال نے وشاکھاپٹنم پورٹ اتھاریٹی میں جاری پروجیکٹس کا جائزہ لیا جہاں 1446کروڑروپئے کی سرمایہ کاری ہوگی۔انہوں نے اتھاریٹی کے صدرنشین پرزوردیا کہ وہ جنگی خطوط پر کروز ٹرمنل،کوورڈاسٹوریج شیڈس، فشنگ ہاربرکو عصری بنانے کے کام مکمل کریں۔