پنجاب سے اب غنڈوں کا صفایا ہو گا: کیجریوال

چنڈی گڑھ، 15 جون (یو این آئی) دہلی کے وزیر اعلی اروند کیجریوال نے کہا ہے کہ اب پنجاب کی عام آدمی پارٹی (آپ) کی حکومت میں سماج دشمن عناصر، ملک دشمن عناصر، غنڈوں کو سیاسی تحفظ دینے والا کوئی نہیں ہے، اس لیے پنجاب کے نام پر گینگسٹرز نہیں ہوں گے۔

مسٹر کیجریوال نے یہاں پنجاب سے دہلی ہوائی اڈے کے لیے لگژری وولوو بس کو ہری جھنڈی دکھائی۔ ان کے ساتھ وزیراعلی بھگونت مان سمیت کئی عہدیدار موجود تھے۔ عوام کو مخاطب کرتے ہوئے انہوں نے کہا کہ اپوزیشن امن و امان کے حوالے سے



ہنگامہ کر رہی ہے لیکن میں ان سے پوچھتا ہوں کہ ان غنڈوں کو مان صاحب اپنے ساتھ لے کر آئے تھے، ارے یہ تو آپ کی پچھلی حکومتوں کے بچے ہیں اور انہوں نے ہی انہیں پیدا کیا تھا۔

انہوں نے کہا کہ پنجاب کی جیلوں میں آپ کی حکومت سے پہلے یہ حالت تھی کہ جیلوں میں وی آئی پی کلچر تھا جہاں یہ غنڈے بیٹھ کر اپنے گینگ چلاتے تھے۔ لیڈروں نے جیلوں میں وی آئی پی کمرے بھی بنائے تھے لیکن اب یہ سب نہیں چلے گا۔ پہلے جرائم پیشہ افراد یا بدمعاش پکڑے نہیں جاتے تھے کیونکہ پولیس کو پہلے سے کال مل جاتی تھی۔