ذات پات کی حامی حکومتیں پسماندہ طبات کو اپنے سماج کے فلاح کا کام نہیں کرنے دیتی:مایاوتی

لکھنؤ:14اپریل(یواین آئی) اترپردیش کی سابق وزیر اعلی اور بہوجن سماج پارٹی(بی ایس پی) سپریمو مایاوتی نے جمعرات کو امبیڈکر جینتی کے موقع پر مخالف پارٹیوں کی حکومتوں کو ذات پات کا حامل قرار دیتے ہوئے الزام لگایا ہے کہ ایسی حکومتیں پسماندہ طبقات کے لیڈروں کو اپنے سماج کا بھلا کرنے کی چھوٹ نہیں دیتی ہیں اور کوئی کچھ کرانے کی کوشش کرتا ہے تو اسے دودھ میں پڑی مکھی کی طرح نکال کر باہر کردیا جاتا ہے۔

مایاوتی نے آئین ساز ڈاکٹر بھیم راؤ امبیڈکر کی 131ویں جینتی پر انہیں خراج عقیدت پیش کرتے ہوئے ملک میں آج بھی دلت اور پسماندہ سماج کی دردناک حالت کو کافی تکلیف دہ قرار دیا ہے۔ انہوں نے سوشل میڈیا پر اپنے پیغام میں کہا'آئین ساز عزت



مآب بابا صاحب ڈاکٹر بھیم راؤ امبیڈکر کی جینتی پر ان کے پیروکاروں کی جانب سے انہیں دل کی گہرائیوں سے سلام اور احترام۔کروڑوں کمزور و محروم طبقات اور محنت کش سماج وغیرہ کے مفاد و بہبود کے تئیں ان کے عظیم و تاریخی کردار کے لئے ملک ہمیشہ مقروض رہے گا۔

انہوں نے حکمراں بھارتیہ جنتا پارٹی (بی جے پی) اور دیگر اپوزیشن جماعتوں پر الزام لگاتے ہوئے کہا'ذات پرست حکومتیں پسماندہ طبقات کے رہنماؤں کو اپنے سماج کے لیے اچھا کرنے کی اجازت نہیں دیتیں۔ اگر کوئی کچھ کرنے کی کوشش کرتا ہے تو اسے دودھ کی مکھی کی طرح باہر پھینک دیا جاتا ہے جیسا کہ یہاں اب تک ہوتا آیا ہے۔ یہی وجہ ہے کہ ان طبقات کی حالت آج بھی بے بس اور لاچار ہے، یہ انتہائی افسوسناک ہے۔