آزادی کے بعد دفاعی پیداوار بڑھانے کی سنجیدہ کوشش نہیں ہوئی: مودی

نئی دہلی، 27 اگست (یو این آئی) وزیر اعظم نریندر مودی نے آزادی کے وقت ملک میں دفاعی پیداوار کے کافی امکانات تھے لیکن بد قسمتی سے دہائیوں تک اس پر توجہ نہیں دی گئی اور ہندوستان دفاعی پیداوار کو درآمد کرنے والا بڑا ملک بن گیا۔

مسٹر مودی نے یہاں فکی اور وزارت دفاع کی جانب سے ’آتم نربھر بھارت‘ کے بارے میں منعقد ویبینار سے خطاب کرتے ہوئے کہا کہ ہندوستان کئی برسوں سے دنیا کے ان ممالک میں شامل رہا ہے جو سب سے زیاد دفاعی پیداوار درآمد کرتے ہیں۔ یہ دفاع کے شعبے میں خود کفیل ہونے کو نظر انداز کیے جانے کے سبب ہوا۔

انہوں نے کہا،’جب ہندوستان آزاد ہوا تھا تو اس وقت دفاعی پیداوار کے لیے ہندوستان میں کافی امکانات تھے۔ اس وقت ہندوستان میں 100 برس سے زیادہ وقت سے قائم دفاعی پیداوار کا ماحول تھا اور ہندوستان کی طرح وسائل اور امکانات بہت کم ملکوں کے پاس تھے۔ لیکن ہندوستان کی بدقستی تھی کہ



دہائیوں تک اس پر اتنی توجہ نہیں دی گئی جتنی کہ دی جانی چاہیےتھی‘۔ یہ ایک طرح کا معمول بن گیا کوئی سنجیدہ کوشش نہیں کی گئی تھی۔ ہمارے بعد، آغاز کرنے والے کئی ملک بھی گذشتہ 50 برس میں ہم سے بہت آگے نکل گئے۔ لیکن اب صورتحال بدل رہی ہے‘۔

وزیر اعظم نے کہا کہ ان کی حکومت نے گذشتہ کچھ برسوں میں دفاعی شعبے کی تمام بیڑیاں توڑنے کی کوشش کی ہے۔ حکومت نے مینوفیکچرنگ بڑھانے، ٹیکنالوجیکل ترقی کرنے اور پرائیویٹ شعبے کو دفاع کے شعبے میں وسعت دینے کی کوشش کی ہے۔ اس مقصد سے کئی اصلاحات کی گئی ہیں۔ انہوں نے کہا کہ اس سے بھی اہم بات یہ ہے کہ دفاع کے شعبے میں ایک نئی ذہنیت پیدا ہوئی ہے۔ جدید اور خود کفیل ہندوستان کے لیے دفاع کے شعبے میں خود اعتمادی کا جذبہ ضروری ہے اور حکومت اس کے لیے ضروری اقدامات کر رہی ہے۔ چیف آف ڈیفنس اسٹاف کی تقرری اس میں بہت اہم ہے۔ یہ فیصلہ نئے ہندوستان کے خود اعتماد ہونے کا مظہر ہے۔