نائیڈوگیبون، سینیگال اور قطر کے دورے پر روانہ

نئی دہلی، 30 مئی (یو این آئی) نائب صدر ایم وینکیا نائیڈو پیر کے روز تین ممالک گیبون، سینیگال اور قطر کے سرکاری دورے پر روانہ ہوگئے ۔

نائب صدر کے سکریٹریٹ نے یہاں بتایا کہ مسٹرنائیڈو کے ساتھ ایک اعلیٰ سطحی وفد بھی گیا ہے جس میں مرکزی وزیر مملکت برائے صحت اورخاندانی بہبود ڈاکٹر بھارتی پروین پوار اورراجیہ سبھا کے ارکان پارلیمنٹ سشیل کمار مودی اور شری وجے پال سنگھ تومر اور لوک سبھا کے رکن پارلیمنٹ پی رابندرناتھ شامل تھے ۔ نائب صدر 7 جون تک دورے پر رہیں گے ۔ اس دورے کے دوران تمام ممالک کے ساتھ کئی دو طرفہ معاہدوں پر دستخط کیے جانے کا امکان ہے ۔

مسٹرنائیڈو کا یہ دورہ کسی بھی نائب صدرکا تینوں ممالک کا پہلا دورہ ہوگا ۔ یہ دورہ ہندوستان سے گیبون اور سینیگال کا پہلا اعلیٰ سطحی دورہ ہے۔ ان کے دورے سے افریقہ کے ساتھ



ہندوستان کے تعلقات مضبوط ہونے اور افریقی براعظم کے ساتھ ہندوستان کے تعلقات کو مضبوط کرنے کی امید ہے۔

مسٹرنائیڈو اپنے دورے کے پہلے مرحلے میں گیبون پہنچیں گے اوروہاں کے وزیر اعظم روز کرسچن اوسوکا ریپونڈا کے ساتھ وفد سطح پر بات چیت کریں گے اور صدر علی بونگو سے ملاقات کریں گے ۔ وہ گیبون میں تاجر برادری سے بھی بات چیت کریں گے اور بیرون ممالک مقیم ہندوستانیوں سے خطاب کریں گے۔

نائب صدر کے دورے کا دوسرا مرحلہ میں سینیگال میں ہو گا اور صدر میکی سال کے ساتھ وفود سطح پر بات چیت کریں گے۔ وہ صدر قومی اسمبلی کے چیرمین مصطفی نیاس اور دیگر معززین سے بھی ملاقاتیں کریں گے۔ ہندوستان اور سینیگال اس سال سفارتی تعلقات کے قیام کی 60ویں سالگرہ منا رہے ہیں ۔ نائب صدر بزنس راؤنڈ ٹیبل میں شرکت کریں گے اور ہندوستانی برادری سے خطاب کریں گے۔