موہن بھاگوت کی کتاب ’مستقبل کا بھارت‘ کا اجرا 5اپریل کو

نئی دہلی،3اپریل (یو این آئی) راشٹریہ سویم سیوک سنگھ کے سرسنگھ چالک موہن بھاگوت جی کی کتاب ’بھوشیہ کا بھارت‘ کا اردو ترجمہ ’مستقبل کا بھارت‘ کے اجرا کی تقریب ڈاکٹر کرشن گوپال جی سہ سرکاریہ واہ آر ایس ایس کے ہاتھوں 5اپریل شام پانچ بجے انڈیا انٹرنیشنل سینٹر میں منعقدہوگی۔یہ اطلاع اج یہاں جاری ایک ریلیز میں دی گئی ہے۔

قومی کونسل برائے فروغ اردو زبان نئی دہلی کے ڈائرکٹر ڈاکٹرشیخ عقیل احمد کے مطابق اس موقعے پر مرکزی وزیر تعلیم ڈاکٹر رمیش پوکھریال ’نشنک‘ مہمان خصوصی کی حیثیت سے شرکت کریں گے۔ ان کے علاوہ ملک کی موقر اور اہم شخصیات بھی تقریب میں موجود رہیں گی۔

انھوں نے کہاکہ ’بھوشیہ کا بھارت‘موہن بھاگوت جی کی اہم تصنیف ہے جس میں ملک کی تہذیب و ثقافت، اخوت اور امن



و سلامتی کے حوالے سے بہت ہی مربوط گفتگو کی گئی ہے اور اس میں ملک کے مستقبل کی خوبصورت تصویر بھی پیش کی گئی ہے۔ موہن بھاگوت جی نے اس کتاب میں بین مذہبی مکالمہ اور ڈائیلاگ پر زور دیا ہے اور سنگھ سے جڑے ہوئے لوگوں کو اسلام کی بنیادی تعلیمات اور تاریخ کا براہِ راست مطالعہ کرنے،نیز مسلمانوں کو سنگھ کی شاکھاؤں میں جاکر براہِ راست معلومات حاصل کرنے کی بات کہی ہے۔

ڈاکٹر شیخ عقیل احمدنے کہا کہ میں نے اس کتاب کا ترجمہ بعنوان ’مستقبل کا بھارت‘اس لیے کیا ہے کہ آرایس ایس جیسی فلاحی و رفاہی تنظیم کے تعلق سے مسلمانوں میں جو غلط فہمیاں اور شکوک و شبہات ہیں وہ دور ہوجائیں اور آر ایس ایس کے بنیادی نظریات کو صحیح سیاق وسباق میں سمجھا جائے، تاکہ دونوں طبقات کے درمیان تفریق وتعصب کا خاتمہ ہو۔