محبوبہ مفتی کی صاحبزادی التجا مفتی کا کورونا ٹیسٹ مثبت

سری نگر،12 اپریل (یو این آئی) پی ڈی پی صدر اور سابق وزیر اعلیٰ محبوبہ مفتی کی صاحبزادی التجا مفتی کا پیر کے روز کورونا ٹیسٹ مثبت آیا ہے اس کی تصدیق ان کی والدہ محبوبہ مفتی نے پیر کے روز اپنے ایک ٹویٹ میں کی ان کا اپنے ایک ٹویٹ میں کہنا تھا: ’میں ان میڈیا رپورٹس کی تصدیق کرنا چاہتی ہوں کہ میری چھوٹی بیٹی التجا مفتی کا آج کورونا ٹیسٹ مثبت آیا ہے۔ ڈاکٹروں کے مشورے کے مطابق اس نے خود کو قرنطینہ کر لیا ہے اور وہ تمام ضروری احتیاطوں پر عمل کر رہی



ہے‘۔

خاندانی ذرائع کے مطابق التجا مفتی حال ہی میں دبئی سے گھر واپس لوٹ آئی تھیں اور واپسی پر ان کا ٹیسٹ مثبت آیا ہے۔

انہوں نے بتایا کہ التجا نے گپکار روڈ پر واقع ’فیئر ویو‘ رہائش گاہ پر خود کو قرنطینہ کر لیا ہے جہاں وہ اپنی والدہ اور نانی کے ساتھ رہائش پذیر ہیں۔

التجا مفتی اپنی والدہ محبوبہ مفتی کی نظر بندی کے دوران ان کا ٹویٹر ہینڈل چلا رہی تھیں۔

چند روز قبل نیشنل کانفرنس کے نائب صدر اور سابق وزیر اعلیٰ عمر عبداللہ کا کورونا ٹیسٹ مثبت آیا تھا۔