محبوبہ مفتی سابق وزیر اعظم منموہن سنگھ کی صحتیابی کے لئے دعا گو

سری نگر،20 اپریل (یو این آئی) پی ڈی پی صدر اور سابق وزیر اعلیٰ محبوبہ مفتی نے سینئر کانگریس لیڈر اور سابق وزیر اعظم ڈاکٹر منموہن سنگھ کی جلد صحتیابی کے لئے دعا کی ہے بتادیں کہ ڈاکٹر منموہن سنگھ کو پیر کے روز آل انڈیا انسٹی ٹیوٹ آف میڈیکل سائنسز دلی کے ٹراما سینٹر میں داخل کیا گیا تھا جہاں ان کا کورونا ٹیسٹ مثبت آیا ہے۔

محبوبہ مفتی نے سابق وزیر اعظم ڈاکٹرمنموہن سنگھ کا کورونا ٹیسٹ مثبت آنے کے رد عمل میں اپنے ایک ٹویٹ میں کہا: ’مجھے منموہن سنگھ جی کو جاننے کا اعزاز حاصل ہے۔ وہ ایک



منکسرالمزاج اور شائستہ شخصیت کے مالک ہیں، ملک کی ترقی کے لئے ان کی خدمات کو الفاظ میں بیان نہیں کیا جاسکتا ہے میں ان کی جلد صحتیابی کے لئے دست بدعا ہوں‘۔

مرکزی وزیر صحت ڈاکٹر ہرش دیو وردھن نے کہا کہ سابق وزیر اعظم کی حالت مستحکم ہے۔

انہوں نے اپنے ایک ٹویٹ میں کہا: ’دلی کے ایمز میں ڈاکٹر منموہن سنگھ جی کی صحت کے بارے میں ان کی نگرانی کرنے والے ڈاکٹروں کی ٹیم کے ساتھ بات کی، ان کی حالت مستحکم ہے۔ انہیں بہترین ممکنہ طبی نگہداشت فراہم کی جا رہی ہے ہم سب ان کی جلد صحتیابی کی دعا کرتے ہیں‘۔