پولیس لاٹھیوں سے زخمی بی آر ایس قائدین سے کے ٹی آر کی ملاقات

حیدرآباد، 11 جولائی (ذرائع) بی آر ایس کے کارگزار صدر  تارک راماراو نے جمعرات کو  پولیس کی  لاٹھیوں سے  زخمی ہونے والے بی آر ایس وی قائدین سے ملاقات کی۔ گزشتہ روز ڈی ایس سی  اور گروپ امتحانات ملتوی کرنے  کے مطالبے پر عثمانیہ یونیورسٹی میں احتجاج اور دھرنے کرنے والے ان قائدین پر پولیس نے لاٹھیوں سے حملہ کرتے ہوئے زخمی کردیا تھا زخمی اسٹوڈنٹ لیڈرس سے تارک راماراو نے نندی نگر میں ملاقات کی۔ اور ان کی صحت سے متعلق معلومات حاصل کی۔ اس موقع پر کارگزار صدر تارک راما راو نے طلبہ اور بے روزگار نوجوانوں کے مسائل



پر  لڑنے والے ان قائدین کے جذبے کو سراہا۔ انھوں نے کہا کہ کانگریس  حکومت آنے کے بعد آپ کی لڑائی کا جذبہ کئی مواقع پر دیکھا گیا ہے۔ جب پوچارم سرینواس ریڈی نے پارٹی سے انحراف  کیا تو اس وقت بھی آپ لوگوں نے پولیس کی لاٹھی کھائی۔ اسی طرح گروپ امتحان اور ڈی ایس سی کو ملتوی کرنے پر احتجاج کرتے ہوئے پریشان حال بے روزگار نوجوانوں کی حوصلہ افزائی کی ہے ۔ کے ٹی آر نے مشورہ دیا کہ وہ عوام مخالف فیصلوں کے معاملے میں کانگریس حکومت کے خلاف جدوجہد جاری رکھیں۔ کے ٹی آر نے یقین دلایا کہ پارٹی کی اعلیٰ قیادت ہمیشہ بی آر ایس وی قائدین کی تائید کرے گی۔