امریکہ اور جنوبی کوریا بھڑکائیں تو تباہ کر دیں،کم جونگ نے اپنی فوج کودیاحکم

ذرائع:

شمالی کوریا:شمالی کوریا کے حکمران کم جونگ اُن نے اپنی فوج کو ہدایت دی ہے کہ اگر امریکہ اور جنوبی کوریا کوئی اشتعال انگیز کارروائی کرتے ہیں تو انہیں مکمل طور پر تباہ کر دیں۔ شمالی کوریا کے میڈیا کے مطابق کم جونگ ان نے قومی سلامتی کو مضبوط بنانے پر بھی زور دیا۔ شمالی کوریا میں حکمران جماعت کا پانچ روزہ اجلاس جاری ہے۔ ہفتے کے روز اسی ملاقات کے دوران کم جونگ اُن نے کہا کہ سال 2024 میں مزید تین فوجی جاسوس سیٹلائٹ لانچ کرنے کا ہدف مقرر کیا گیا ہے۔ گزشتہ نومبر میں ہی شمالی کوریا نے اپنا پہلا فوجی جاسوس سیٹلائٹ کامیابی سے لانچ کیا تھا۔

اتوار کو کم جونگ اُن نے شمالی کوریا کی فوج کے کمانڈنگ افسران سے ملاقات کی۔ اس ملاقات میں انہوں نے کہا کہ قومی سلامتی کے لیے اپنی فوجی تیاریوں کو مضبوط کرنے کی ضرورت ہے۔ کم نے کہا کہ ہماری فوج کو تمام ضروری اقدامات کرنے چاہئیں اور ان ممالک کو مکمل طور پر تباہ کرنا چاہیے جو ہمارے خلاف کارروائی کرتے ہیں اور اس کے لئے انہیں ایک لمحے کے لئے بھی نہیں ہچکچانا



چاہیے۔

کوریائی حکمراں نے کہا کہ کوریا طاقت کے ذریعے حقیقی، دیرپا امن قائم کر رہا ہے، نہ کہ شائستہ امن جس کا انحصار مخالف کی خیر سگالی پر ہو۔کم نے جنوبی کوریا کو ایک نوآبادیاتی ماتحت ریاست کے طور پر تنقید کا نشانہ بنایا جس کا معاشرہ یانکی ثقافت سے داغدار ہے۔ انہوں نے کہا کہ فوج کو کسی تنازع کی صورت میں جنوبی کوریا کے پورے علاقے پر قبضہ کرنے کے لئے جوہری ہتھیاروں سمیت تمام دستیاب ذرائع استعمال کرنا چاہیے۔

واضح رہے کہ شمالی کوریا کے حکمراں کم جونگ ان اپنی فوج کو مضبوط کرنے کے لئے چین اور روس کے ساتھ مل کر کام کر رہے ہیں۔ اس کے علاوہ شمالی کوریا بھی اپنے جوہری ہتھیاروں کے ذخیرے کو بڑھانے میں مصروف ہے۔ میڈیا رپورٹس کے مطابق شمالی کوریا کے پاس 20 سے 30 نیوکلیئر بم سے لے کر 100 سے زیادہ بم ہو سکتے ہیں۔ تاہم کئی دفاعی ماہرین کا خیال ہے کہ شمالی کوریا کو اب بھی بعض  تکنیکی چیلنجز کا سامنا ہے جس کی وجہ سے وہ بین البراعظمی میزائل بنانے میں کامیاب نہیں ہو سکا ہے۔ تاہم اس کے کم فاصلے تک مار کرنے والے جوہری میزائل جاپان اور جنوبی کوریا کو نشانہ بنا سکتے ہیں۔