کورونا ویکسین لینے کے بعد نصف گھنٹے کا آرام ضروری

نئی دہلی، 4 جنوری (یو این آئی) کورونا وائرس (کووڈ-19) کی ویکسین لینے کے بعد ہر شخص کو ٹیکہ کاری سینٹر میں کم از کم آدھے گھنٹے آرام کرنا پڑے گا تاکہ اگر وہ ویکسین لینے کے بعد کوئی پریشانی محسوس ہو تو وقت پر اس کا علاج کیا جاسکے۔

مرکزی وزارت صحت و خاندانی بہبود نے پیر کے روز کہا کہ ہر شخص کو کورونا ویکسین کی خوراک لینے کے بعد ٹیکہ کاری سنٹر میں کم از کم آدھے گھنٹے کا آرام کرنا چاہئے۔

اگر کوئی شخص کورونا ویکسین لینے کے بعد کسی بھی قسم کی تکلیف محسوس کرتا



ہے تو اسے نزدیکی طبی حکام، اے این ایم یا آشا کارکن کو مطلع کرنا چاہئے۔

ٹیکہ کاری کے بعد ہلکا بخار آنا اور انجیکشن کی جگہ پر درد ہونا معمول کی بات ہے۔ مرکزی حکومت نے تمام ریاستوں اور مرکزکے زیر انتظام علاقوں کو ہدایت دی ہے کہ وہ کورونا ویکسین کے مضر اثرات سے نمٹنے کے لئے پوری تیاری کرے۔

وزارت صحت نے یہ بھی کہا ہے کہ لوگ کورونا ویکسین لینے کے بعد بھی کووڈ-19 کی ہدایات پر عمل کریں۔ ماسک لگائیں، ہینڈ سنیٹائزر کا استعمال کریں اور ایک دوسرے سے دو گز کی دوری رکھیں۔