رجب طیب اردگان نے ترکی کے صدارتی انتخاب میں تاریخی کامیابی حاصل کی

صدر رجب طیب اردگان نے ترکی کا صدارتی انتخاب جیت لیا ہے، اتوار کو ہونے والے رن آف ووٹ میں حزب اختلاف کے رہنما کمال کلیدار اوغلو کو شکست دے کر اپنی حکمرانی کو تیسری دہائی تک بڑھا دیا ہے۔

99.43% ووٹوں کی گنتی کے ساتھ، اتوار کو ترکی کی سپریم الیکشن کونسل (YSK) کی طرف سے اعلان کردہ ابتدائی سرکاری نتائج میں اردگان کو %52.14 ووٹوں کے ساتھ کامیابی حاصل ہوئی۔ کلیدار اوغلو نے %47.86 حاصل کیا۔

انقرہ میں صدارتی احاطے کے باہر اپنے ہزاروں حامیوں سے خطاب کرتے ہوئے، اردگان نے کہا کہ اب وقت آگیا ہے کہ "انتخابی مدت کے حوالے



سے تمام بحثوں اور تنازعات کو ایک طرف رکھ کر اپنے قومی مقاصد اور خوابوں کے گرد متحد ہو جائیں۔"

 اردگان نے کہا "ہم صرف فاتح نہیں ہیں، فاتح ترکی ہے۔ فاتح ہمارے معاشرے کے تمام حصے ہیں، ہماری جمہوریت فاتح ہے"۔

اردگان نے مزید کہا کہ حکومت کی اہم ترجیحات میں مہنگائی سے لڑنا اور 6 فروری کو آنے والے تباہ کن زلزلے کے زخموں پر مرہم رکھنا ہے جس میں ترکی اور پڑوسی شام میں 50,000 سے زیادہ جانیں گئیں۔

دارالحکومت انقرہ میں اپنی پارٹی کے ہیڈکوارٹر میں خطاب کرتے ہوئے، کلیدار اوغلو نے کہا کہ وہ ترکی میں "حقیقی جمہوریت" کے آنے تک لڑتے رہیں گے۔