بہار حکومت کی ناکامی کا فیصلہ عوام کو اعداد و شمار سے کرنا چاہیے: شبلی منظور

بھاگلپور، 28 اکتوبر (یوا ین آئی) بہار میں غربت، نقل مکانی، بے روزگاری اور ہر سطح پر ریاست کو پیچھے رکھنے کے لئے حکومت بہار کو سخت تنقید کا نشانہ بناتے ہوئے بہار اقلیتی کانگریس کے نائب صدر اور تنظیمی انچارج شبلی منظور نے کہا کہ حکومت بہار کی ناکامی کی وجہ سے یہاں کے عوام ذلت کی زندگی گزارنے پر مجبور ہیں۔ یہ الزام انہوں نے گزشتہ شام یہاں ایک پریس کانفرنس سے خطاب کرتے ہوئے لگایا۔

انہوں نے کہاکہبہار کے عوام کو گزشتہ دہائیوں میں حکومتوں نے دھوکہ دیا ہے۔ آبپاشی کے لیے نہریں، کانگریس حکومت کے بنائے ہوئے ڈیم، روزگار کے لیے بنائے گئے



کارخانے بند کر دیے گئے۔ تعلیم اور صحت کا ترقی یافتہ نظام تباہ کر دیا گیا جس کی وجہ یہاں کے عوام نہ صرف روزگار کیلئے بلکہ علاج کے لئے بھی دوسری ریاستوں کا چکر لگانے پر مجبور ہیں۔

انہوں نے کہا کہ اتنی زرخیز زمین اور محنتی اور ذہین شہری ہونے کے باوجود بڑی تعداد میں نقل مکانی پر مجبور ہیں۔ ایک سازش کے تحت بہار کی محنتی اور ہونہار آبادی کو روزگار کے مواقع فراہم نہ کر کے انہیں ہجرت پر مجبور کیا جا رہا ہے تاکہ مرکزی حکومت کے سرمایہ دار دوستوں کو سستے،مزدور ملتا رہے۔انہوں نے کہاکہ عزت نفس کی خاطر بہار کے لوگوں کو نقل مکانی کی اس لعنت سے بچانے کی ضرورت ہے۔