تنخواہ اور پنشن نہ ملنے کے خلاف اساتذہ کا مظاہرہ

نئی دہلی، 5 ستمبر (یواین آئی) یوم اساتذہ (ٹیچرس ڈے) کے موقع پر دہلی یونیورسٹی کے اساتذہ نے دارالحکومت کے 12 کالجوں میں تنخواہ اور پنشن نہ ملنے کے خلاف ہفتہ کے روز احتجاجی مظاہرہ کرکے گرفتاری دی۔

دہلی یونیورسٹی ٹیچرس ایسوسی ایشن کے صدر راجیو رائے کی سربراہی میں تقریباً 100 اساتذہ نے چہروں پر ماسک لگاکر مظاہرہ کیا اور ’دہلی حکومت شرم کرو شرم کرو‘ کے نعرے لگائے۔ ان اساتذہ نے بینرز اور پوسٹر ہاتھوں میں اٹھا کر یونیورسٹی کیمپس میں مظاہرہ کیا۔

واضح رہے کہ دہلی یونیورسٹیوں کی اساتذہ پچھلے کئی مہینوں سے دہلی کے 12 کالجوں میں تنخواہ اور پنشن نہ ملنے کے خلاف تحریک چلا رہے ہیں۔ ان 12



کالجوں کو جزوی طور پر دہلی حکومت نے مالی اعانت فراہم کی ہے، لیکن کچھ مہینوں سے دہلی حکومت نے ان کالجوں کو دی جانے والی مالی امداد روک دی ہے، جس کی وجہ سے ان کالجوں میں اساتذہ کو تنخواہ اور پنشن نہیں مل پا رہی ہے۔

دہلی یونیورسٹی کے اساتذہ نے آج زبردست مظاہرہ کیا کہ پولیس نے انہیں گرفتار کرلیا اور تقریباً 28 اساتذہ کوپکڑ کر لے گئی۔ اساتذہ نے اس واقعے کے خلاف مورس نگر پولیس اسٹیشن میں احتجاج کیا۔ اساتذہ کا الزام ہے کہ دہلی حکومت اپنے کالجوں کی انتظامی کمیٹیوں میں اپنے لوگوں کو داخل کرنا چاہتی ہے لہذا وہ کافی دباؤ کی پالیسی اختیار کررہی ہے اور ان کالجوں کو دی جانے والی امداد کو بند کر دیا ہے۔