دہلی فسادات 2020 کی عدالتی تحقیقات کروائے حکومت: آنندشرما

نئی دہلی، 12 مارچ (یو این آئی) کانگریس نے دہلی فسادات کو ایک منظم سازش قرار دیتے ہوئے جمعرات کوراجیہ سبھا میں کہا کہ سپریم کورٹ کی نگرانی میں ان کی عدالتی تحقیقات کروائی جانی چاہیے۔

راجیہ سبھا میں کانگریس کے ڈپٹی لیڈر آنند شرما نے دہلی فسادات پر بحث میں حصہ لیتے ہوئے کہا کہ یہ شہریت ترمیمی قانون کی مخالفت کے فسادات نہیں تھے بلکہ دونوں فرقوں کی اس میں حصہ داری ہے۔ حکومت کو پوری ایمانداری کے ساتھ سپریم کورٹ کی نگرانی میں ان کی عدالتی تحقیقات کروانی چاہیے۔ اس عمل سے حکومت پر عوام کا



اعتماد بڑھے گا اور لاء اینڈ آرڈر (امن عامہ) خراب کرنے والوں کو سزا دی جا سکے گی۔

انہوں نے کہا کہ کہا جا رہا ہے کہ دہلی سے باہر کے عوام ہتھیاروں کے ساتھ آئے اور دہلی کے عوام کو نشانہ بنایا گیا۔ انہوں نے کہا کہ حکومت کو نجی سیناؤں پر فوراً پابندی لگانی چاہیے۔ ملک میں جمہوریت ہے اور آئینی انتظام ہے جس کے تحت پولیس، نیم فوجی دستے اور مسلح افواج ہیں۔

مسٹر شرما نے کہا دہلی میں اتنی بڑی سطح پر خفیہ ایجنسیوں کی ناکامی ہے۔ فی الحال حکومت تمام متاثرین کی بازآبادکاری بنائے اور ان کو مناسب معاوضہ دے۔