جہانگیرپوری سے تجاوزات ہٹانے کے معاملے میں میونسپل کمشنر کے خلاف کارروائی کی جائے: سوری

نئی دہلی، 20 اپریل (یو این آئی) کانگریس کے سینئر لیڈر اور دہلی میونسپل کارپوریشن کے سابق میئر فرہاد سوری نے جہانگیر پوری میں بلڈوزر آپریشن کو غیر قانونی قرار دیتے ہوئے شمالی دہلی میونسپل کارپوریشن کے کمشنر اور میئر کے خلاف کارروائی کا مطالبہ کیا ہے مسٹر فرہاد سوری نے بدھ کے روز یو این آئی سے بات کرتے ہوئے جہانگیر پوری میں کارپوریشن کی طرف سے چلائے جانے والے بلڈوزر آپریشن کو غیر قانونی قرار دیا۔ انہوں نے کہا کہ غیر قانونی تعمیرات کے خلاف کارروائی کی صورت میں ڈی ایم سی ایکٹ کی دفعہ 343/344 کے تحت نوٹس جاری کرنا لازمی ہے۔ اس کے بعد متاثرہ کو اپنا کیس پیش کرنے کا موقع بھی دیا جاتا ہے۔ آج کی کارروائی میں اصولوں کی پامالی کی گئی ہے، اس غیر قانونی کارروائی کے لیے شمالی دہلی میونسپل کارپوریشن کے کمشنر سمیت اعلیٰ افسران کے خلاف کارروائی کی جانی چاہیے جو اس میں ملوث ہیں۔

انہوں نے کہا کہ بی جے پی کے دہلی



ریاستی صدر آدیش گپتا نے شمالی دہلی میونسپل کارپوریشن کے میئر کو تشدد زدہ علاقے میں کارروائی کرنے کا حکم دیا تھا۔ آخر آدیش گپتا نے کس حیثیت سے ایسا حکم جاری کیا جسے میئر نے قبول کر لیا۔ پہلی غلطی میئر نے کی۔ اس کے بعد دوسری سب سے بڑی غلطی کمشنر سے یہ ہوئی کہ انہوں نے غیر قانونی حکم کیوں مانا؟

سابق میئر نے کہا کہ کارپوریشن کے کمشنر ایک سینئر آئی اے ایس افسر ہیں، انہیں اس قانون کا علم ہونا چاہیے کہ کسی بھی غیر قانونی ڈھانچے کو توڑنے سے پہلے قوانین پر عمل کرنا ضروری ہے۔ کارپوریشن کے لیے یہ لازمی ہے کہ وہ غیر قانونی تعمیرات کے خلاف کارروائی کی صورت میں ڈی ایم سی ایکٹ کی دفعہ 343/344 کے تحت نوٹس جاری کرے۔ جس طرح جہانگیر پوری میں جلد بازی میں کارروائی کرنے کی کوشش کی گئی، اس سے کھلم کھلا قانون کی دھجیاں اڑائی گئیں۔ اس میں متاثرین کو اپنا موقف پیش کرنے کا موقع نہیں دیا گیا، جب کہ کارپوریشن ایکٹ کے مطابق ایسا کرنا لازمی ہے۔