دلی اسمبلی انتخابات کے لئے کانگریس۔ آر جے ڈی میں سمجھوتہ

نئی دہلی، 18جنوری (یو این آئی) کانگریس اور بہار کے سابق وزیراعلی لالو پرساد یادو کی پارٹی راشٹریہ جنتادل (آر جےڈی) دلی اسمبلی انتخابات مل کر لڑے گی۔ دونوں پارٹیوں کے درمیان ہوئے سمجھوتے کے تحت آر جے ڈی کو چار سیٹیں دی گئی ہیں۔

دلی ریاستی کانگریس کمیٹی کے صدر سبھاش چوپڑہ نے سنیچر کے روز پریس کانفرنس میں کانگریس اور آر جے ڈی کے درمیان انتخابی سمجھوتہ کے تعلق سے پوچھے جانے پر کہا کہ دونوں پارٹیوں نے دلی اسمبلی انتخابات ایک ساتھ مل کر لڑنے کا فیصلہ کیا ہے۔ اس موقع پر کانگریس کے دلی انچارج اور



پارٹی جنرل سکریٹری پی سی چاکو بھی موجود تھے۔

یہ پوچھے جانے پر کہ کیا آر جے ڈی اپنے انتخابی نشان پر انتخاب لڑے گی ، کانگریس کے مسٹر چوپڑہ نے کہا کہ ابھی اس کا فیصلہ نہیں ہوا ہے۔ انہوں نے کہا کہ ابھی یہ فیصلہ بھی نہیں ہوا ہے کہ آر جے ڈی کون کونسی سیٹوں پر انتخاب لڑے گی۔

واضح رہے کہ بہار میں آر جےڈی کے عظیم اتحاد کا کانگریس حصہ ہے۔ حال ہی میں جھارکھنڈ اسمبلی انتخابات میں جھارکھنڈ مکتی مورچہ، کانگریس اور آر جے ڈی نے مل کر انتخاب لڑا تھا۔

دلی اسمبلی کی 70 سیٹوں کے لئے انتخابات 8 فروری کو ہونے ہیں۔