لوک سبھا میں 3 سے 5 مارچ کے واقعات کی تحقیقات کے لیےکمیٹی کا اعلان

نئی دہلی، 06 مارچ (یو این آئی) کانگریس کے 07 اراکین پارلیمنٹ کو پورے سیشن کے لیےمعطل کیےجانے کے بعد لوک سبھا اسپیکر اوم برلا نے ایوان میں تین سے پانچ مارچ کے درمیان ہونے والے واقعات کی تحقیقات کے لیےکل جماعتی کمیٹی قائم کرنے کا اعلان کیا ہے۔

لوک سبھا کے ڈپٹی اسپیکر ڈاکٹر کریٹ سولنکی نے جمعہ کو یہ اطلاع دیتے ہوئے بتایا کہ کمیٹی میں تمام جماعتوں کو نمائندگی دی جائے گی اور مسٹر برلا خود اس کمیٹی کے چیئرمین ہوں گے۔ یہ کمیٹی ایوان میں تین سے پانچ مارچ کے درمیان ہونے والے واقعات کی تحقیقات کرے گی۔

کانگریس سمیت تمام اپوزیشن پارٹیاں لوک سبھا اسپیکر سے کانگریس کے ساتوں اراکین کی معطلی واپس لینے کا مطالبہ کر رہے ہیں۔ سمجھا جاتا



ہے کہ کمیٹی کےتحقیقات کی بنیاد پر اراکین کی معطلی واپس لینے کے بارے میں غوروخوض کیاجا سکتا ہے اگرچہ ڈاکٹر سولنکی نے ایوان میں صرف اتنا کہا کہ کمیٹی تین سے پانچ مارچ کے درمیان کی کارروائی کے دوران ہونےو الے واقعات کی تحقیقات کرے گی ۔

غور طلب ہے کہ کانگریس اور دیگر اہم اپوزیشن جماعتوں کے رکن بجٹ اجلاس کے دوسرے مرحلے کے آغاز سے ہی دہلی فسادات 2020 کے سلسلے میں ایوان زیریں میں بحث کروانے کا مطالبہ کر رہے ہیں لیکن حکومت کا کہنا ہے کہ وہ 11 مارچ کو اس مسئلے پر بحث کروائے گی جس کے تعلق سے ایوان میں ہنگامہ ہوتا رہا اور گذشتہ پانچ دن میں کوئی کام کاج نہیں ہوسکا۔ لوک سبھا کی کارروائی آج ملتوی ہو گئی ہے اور اب ایوان کی کارروائی 11 مارچ سے شروع ہوگی۔