پینگونگ جھیل پر چین کا دوسرا زیر تعمیر پل اس کے غیر قانونی قبضے والے علاقے میں ہے: ہندوستان

نئی دہلی، 20 مئی (یو این آئی) ہندوستان نے جمعہ کو کہا کہ لداخ کے علاقے میں پینگونگ جھیل پر چین کی طرف سے ایک نیا پل بنایا جا رہا ہے جس کے ساتھ پہلے سے تعمیر شدہ پل بھی اس علاقے میں ہے جو 1960 کی دہائی سے چین کے غیر قانونی قبضے میں ہے۔

وزارت خارجہ کے ترجمان ارندم باگچی نے بھی ایک بیان میں کہا کہ حکومت ملک کی سلامتی سے متعلق تمام پیش رفتوں پر مسلسل نظر رکھتی ہے اور ملک کی خودمختاری اور علاقائی



سالمیت کے تحفظ کے لیے تمام ممکنہ اقدامات کرتی ہے۔

وزارت خارجہ کے بیان میں کہا گیا ہےکہ’’ہم نے چین کی جانب سے پینگونگ جھیل پر پہلے کے پل کے ساتھ ایک نیا پل بنانے کی اطلاعات دیکھی ہیں۔ یہ دونوں پل ان علاقوں میں ہیں جو 1960 کی دہائی سے غیر قانونی طور سے چینیوں کے قبضے میں ہیں۔ ہم نے اپنی زمین پر اس طرح کے غیر قانونی قبضے کو کبھی قبول نہیں کیا اور نہ ہی ہم نے چین کے بلاجواز دعووں یا تعمیراتی کام کو قبول کیا ہے۔