مرکزی حکومت دہلی کو آج ہی 490 ٹن آکسیجن فراہم کرے: ہائی کورٹ

نئی دہلی، یکم مئی (یو این آئي) دہلی ہائی کورٹ نے ہفتہ کے روز مرکزی حکومت کو ہدایت دی کہ وہ دہلی کے لئے مختص 490 ٹن مائع طبی آکسیجن آج ہی فراہم کرے اور ایسا کرنے میں ناکام رہنے پر عدالت اس کے خلاف توہین عدالت کی کارروائی پر غور کر سکتی ہے۔

ہائی کورٹ نے بترا اسپتال میں آکسیجن کی شدید قلت سے درخواست کی فوری سماعت کرتے ہوئے یہ سخت ہدایت دی ہے۔ سماعت کے دوران اسپتال نے عدالت کو بتایا کہ آکسیجن کی کمی کے سبب اسپتال میں اب تک آٹھ مریضوں کی موت



ہوچکی ہے۔

جسٹس وپن سانگھی اور جسٹس ریکھا پلی کے بنچ نے کہا کہ "ہم مرکزی حکومت کو ہدایت دیتے ہیں کہ وہ کسی بھی حال میں دہلی کو 490 ٹن آکسیجن کی فراہمی آج ہی یقینی بنائے"۔

جسٹس سانگھی نے مرکز کی جانب سے پیش ہونے والے ایڈیشنل سالیسٹر جنرل چیتن شرما سے کہا کہ "اب پانی سر سے اوپر ہوگیا ہے، اور اب بہت ہوچکا"۔

جج نے کہاکہ "ہم 490 ٹن سے زیادہ آکسیجن دینے کو نہیں کہہ رہے ہیں۔ آپ نے اسے مختص کردیا ہے۔ اب آپ کے اوپر واجب ہے کہ اس کی فراہمی جلد کریں"۔