مرکزی حکومت کورونا وائرس کے انتظام میں پوری طرح ناکام ہوچکی ہے: سیسودیا

نئی دہلی، 31 مئی ، (یو این آئی) دہلی کے نائب وزیر اعلی منیش سیسودیا نے بھارتیہ جنتا پارٹی (بی جے پی) کے ذریعہ بحران کے دوران کی جانے والی نیچ سیاست کی مذمت کرتے ہوئے کہا کہ مرکزی حکومت اور بی جے پی کی زیر اقتدار ریاستیں کورونا وائرس کی وباء سے نمٹنے میں پوری طرح ناکام ہوچکی ہیں، پھر بھی جب دہلی کی کیجریوال حکومت لوگوں کی مدد کررہی ہے تو انہیں برا بھلا کہا جارہا ہے۔

مسٹر سیسودیا نے آج صحافیوں سے بات کرتے ہوئے کہا کہ دہلی حکومت



کی یہ کوشش ہے کہ جلد سے جلد دہلی کے تمام شہریوں کو ٹیکے لگا کر کورونا وائرس کی چین کو توڑا جائے۔ جب بھی اروند کیجریوال کوئی کام کرنا شروع کرتے ہیں، تو بی جے پی کے لیڈران ان کے خلاف اپنی بیان بازی شروع کردیتے ہیں اور انھیں گالیاں دینے لگتے ہیں۔ ہریانہ کے وزیر اعلی منوہر لال کھٹر نے حال ہی میں بیان دیا ہے کہ اروند کیجریوال ٹیکہ کاری میں جلدبازی کررہے ہیں۔ انہیں ٹیکے لگانے کی رفتار کو کم کرنا چاہئے اور زیادہ سے زیادہ ویکسین بچانی چاہئے۔