آزادکو پدم بھوشن ملنے کا استقبال کیا جانا چاہیے: کرن سنگھ

نئی دہلی، 27 جنوری (یو این آئی) کانگریس کے سینئر لیڈر ڈاکٹر کرن سنگھ نے جموں و کشمیر کے سابق وزیر اعلیٰ غلام نبی آزاد کو پدم بھوشن سے نوازے جانے کی حمایت کرتے ہوئے کہا ہے کہ اس پر سیاست کرنا غلط ہے اور ان کو ملنے والے اس اعزاز کا سبھی کو خیر مقدم کرنا چاہئے۔

جمعرات کو یہاں ایک بیان میں ڈاکٹر سنگھ نے کہا کہ مسٹر آزاد کو پدم بھوشن ایوارڈ سے متعلق جو تبصرے کئے جارہے ہیں وہ افسوسناک ہیں۔ مسٹر آزاد اس اعزاز کے مستحق ہیں اور اس پر کسی قسم کی سیاست



کرنا غلط ہے۔

انہوں نے کہا کہ وہ مسٹر آزاد کو 1971 سے جانتے ہیں جب انہوں نے ادھم پور سیٹ سے لوک سبھا الیکشن لڑا تھا۔ اس دوران ایک نوجوان کارکن کے طور پر مسٹر آزاد نے اپنے انتخاب میں جوش و خروش سے حصہ لیاتھا۔ انہوں نے کہا کہ آزاد نے اپنی محنت، لگن اور جدوجہد کی بدولت سیاسی بلندیاں حاصل کی ہیں۔ وہ جموں خطے کے پہلے لیڈر ہیں جو جموں و کشمیر کے وزیر اعلیٰ بنے۔ وہ سات سال تک راجیہ سبھا میں حزب اختلاف کے لیڈر رہے اور کانگریس میں کئی اہم ذمہ داریاں ادا کر چکے ہیں۔