سیدھی حادثے میں ہلاک شدگان کے لواحقین کو پانچ پانچ لاکھ روپے کی مدد کا اعلان

بھوپال ،16فروری (یواین آئی) مدھیہ پردیش کے وزیراعلی شیوراج سنگھ چوہان نے سیدھی ضلع میں نہر میں بس گرنے کی وجہ سے 37 مسافروں کی موت پر دکھ کا اظہار کرتے ہوئے ان کے لواحقین کو پانچ پانچ لاکھ روپے کی مدد دینے کا اعلان کیا ہے سرکاری ذرائع کے مطابق مسٹر چوہان نے کہا کہ یہ حادثہ بے حد تکلیف دہ ہے۔ انہوں نے ہلاک شدگان کے تئیں تعزیت کااظہار کرتے ہوئے کہا کہ سوگوار لواحقین کے ساتھ دکھ کی اس گھڑی میں وہ اور پوری حکومت ان کے ساتھ ہیں۔ انہوں نے کہا کہ حادثے کی اطلاع کے بعد سے ہی وہ سیدھی ضلع اوار ریوا ڈیویژن انتظامیہ کے رابطے میں تھے اور مسلسل انہیں ہدایت دی جارہی تھی۔

اس دوران اس دل دہلا دینے والے حادثے کی وجہ سے مسٹر چوہان نے آج یہاں منعقد ہونے والا



’گرہ پرویشم ‘پروگرام بھی ملتوی کردیا۔اس پروگرام میں ویڈیو کانفرنسنگ کے ذریعہ سے مرکزی وزیر داخلہ امت شاہ بھی شامل ہونے والے تھے۔مدھیہ پردیش میں پردھان منتری آواس یوجنا (دیہی) کے تحت بنائے گئے ایک لاکھ مکانوں میں شیئر ہولڈروں کے ایک ساتھ گرہ پرویش کا پروگرام ’گرہ پرویشم‘ آج دن میں منعقد ہونے والا تھا۔

اس کے علاوہ یہاں منعقد ہونے والی ریاستی کابینہ کی میٹنگ بھی ملتوی کر دی گئی۔ مسٹر چوہان نے سیدھی معاملے پر ہی توجہ مرکوز کرنے کے پیش نظر آج کے دیگر سرکاری پروگرام بھی ملتوی کردئے۔ انہوں نے متعلقہ محکموں کے وزرا کی فوری طورپر میٹنگ بلائی اور انہیں ضروری ہدایت دی۔ اس کے بعد آبی وسائل کے وزیر تلسی رام سلاوٹ کو فوری طورپر جائے وقوع پر بھیج دیا گیا۔