جنوبی برازیل میں بدترین طوفان سے 29 افراد ہلاک، 60 دیگر لاپتہ

برازیل کی جنوبی ریاست ریو گرانڈے ڈو سول میں مسلسل چار دنوں کی شدید بارشوں، سیلاب اور مٹی کے تودے گرنے کے بعد بدترین طوفان نے 29 افراد کی جان لے لی اور 60 دیگر لاپتہ ہو گئے، گورنر ایڈوارڈو لیئٹ نے جمعرات کو بتایا۔

انہوں نے کہا بدقسمتی سے ہم جانتے ہیں کہ یہ تعداد بڑھے گی، گورنر نے طوفانوں کو ریاست کی تاریخ کی بدترین قدرتی آفت قرار دیا۔

برازیل کے صدر لوئیز اناسیو لولا ڈا سلوا نے جمعرات کو ریاست کے سب سے زیادہ متاثرہ شہروں میں سے ایک سانتا ماریا کا دورہ کیا اور گورنر سے ملاقات کی۔ لولا نے یوراگوئے اور ارجنٹائن کی سرحد سے متصل ریاست میں ہنگامی صورتحال سے نمٹنے کے لیے وفاقی فنڈ اور امداد کی پیشکش کی۔

صدر نے کہا "صحت کا



خیال رکھنے کے لیے وفاقی حکومت کی مدد کی کوئی کمی نہیں ہوگی، ٹرانسپورٹیشن اور خوراک، ضرورت کی ہر وہ چیز اور ان کی دیکھ بھال کے لیے پیسے کی کمی نہیں ہوگی۔ خواہ وزراء، سول سوسائٹی یا ہماری فوج کے ذریعے، ہم چوبیس گھنٹے کوششیں وقف کریں گے تاکہ ہم بارشوں میں پھنسے ہوئے لوگوں کی بنیادی ضروریات کو پورا کر سکیں‘‘۔

آنے والے مزید بارشوں کی پیش گوئی کے ساتھ گورنر نے رہائشیوں سے کہا کہ وہ اونچی زمین کی طرف جائیں اور شہری دفاع کی ایجنسی کی طرف سے شناخت کیے گئے سیلاب زدہ علاقوں سے دور رہیں۔

انہوں نے کہا کہ تقریباً 4,400 مکینوں کو نکال لیا گیا ہے لیکن ہزاروں مزید افراد اپنے سیلاب زدہ گھروں سے نکالے جانے کے منتظر ہیں۔

شہری دفاع کے بلیٹن کے مطابق قدرتی آفت سے 154 شہر متاثر ہوئے ہیں۔