اولمپک باکسنگ میں ہندوستان چار تمغے جیتے گا: سریتا دیوی

نئی دہلی ، 17 جون (یو این آئی) سابق عالمی چیمپیئن ایل سریتا دیوی کو لگتا ہے کہ ہندوستان کے پاس اس مرتبہ 23 جولائی سے 8 اگست تک ہونے والے ٹوکیو اولمپکس میں کم از کم چار باکسنگ میڈلز جیتنے کا اچھا امکان ہے۔

سریتا نے یہ بات 'دلی لیٹس پلے' کے ساتھ خصوصی گفتگو میں کہی۔ ہندوستان کے نو باکسروں نے اس بار ٹوکیو کے لئے کوالیفائی کیا ہے۔

سریتا نے بتایاکہ “اس سال ہونے والے ٹوکیو اولمپکس میں ہندوستان کے پاس بہت اچھا موقع ہے۔ کوالیفائی کرنے والے تمام کھلاڑی کوالیفائنگ کوچز اور معاون عملے کی نگرانی میں اچھی تیاری کر رہے ہیں۔ وزارت



کھیل تمام کھلاڑیوں کو وہ چیزیں فراہم کررہی ہیں جن کی انہیں ضرورت ہے۔ اس کو دیکھتے ہوئے مجھے لگتا ہے کہ اس بار ہندوستان کے پاس پچھلے ایڈیشنوں کے مقابلے میں کہیں زیادہ بہتر مواقع ہیں۔

اولمپکس میں میڈلز کی تعداد کے بارے میں پوچھے جانے پر سریتا نے بتایاکہ میں باکسنگ کے بارے میں پہلے کہوں گی۔ میرے خیال میں ہندوستان اس بار باکسنگ میں کم از کم چار تمغے جیت سکتا ہے کیونکہ ہمارے کھلاڑیوں کو تربیت کا بہتر ماحول مل گیا ہے۔ ہم تیر اندازی ، ریسلنگ ، شوٹنگ اور بیڈ منٹن میں بھی تمغوں کی توقع کر سکتے ہیں اور ہاکی میں بھی ہندوستان تمغے جیت سکتا ہے۔