روزانہ 4 ہزار آر ٹی پی سی آر ٹسٹ کرنے کے ہدف کے ساتھ کام کریں:دامودھرراج نرسمہاکی عہدیداروں کوہدایت

ذرائع:

حیدرآباد۔ملک میں کورونا کیسس میں روز بروز اضافہ ہورہا ہے۔ جہاں تک تلنگانہ کا تعلق ہے، 12 نئے مثبت کیس رپورٹ ہوئے ہیں۔ اس سلسلے میں ریاستی طبی اور صحت کے محکمے کء جانب سے ایک بلیٹن جاری کیا گیاہے۔بلیٹن کے مطابق حیدرآباد میں 9، ورنگل، رنگا ریڈی اور سنگاریڈی اضلاع میں ایک ایک کیس درج کیاگیاہے۔ جبکہ ایک شخص کووڈ سے صحت یاب ہوا ہے، 38 دیگر زیر علاج ہیں۔محکمہ صحت کے مطابق گزشتہ 24 گھنٹوں میں 1322 افراد کا کووِڈ ٹسٹ کیا گیا۔ 30 کی رپورٹ آنا باقی ہے۔

دوسری جانب تلنگانہ میں کورونا کیسس کی بڑھتی ہوئی تعداد کے پیش نظر ریاستی وزیرصحت دامودھر راج نرسمہا نے صورتحال کاجائزہ لیا۔ انہوں نے آکسیجن سلنڈر اور وینٹی لیٹرز جیسے کورونا سے



بچاؤ کے لئے کئے جانے والے اقدامات کے بارے میں دریافت کیا۔ عہدیداروں نےریاستی وزیر کو جانکاری دی کہ ریاستی حکومت کے تحت چلائے جانے والے لیابس میں ایک دن میں 16,500 آرٹی پی سی آر ٹسٹ کرنے کی صلاحیت ہے۔ عہدیداروں نے راج نرسمہا کو بتایا کہ 84 مزید نجی آر ٹی پی سی آر لیابس دستیاب ہیں۔

بعد میں ریاستی وزیر دامودھر راج نرسمہا نے متعلقہ عہدیداروں کوہدایت دی کہ وہ روزانہ 4 ہزار آر ٹی پی سی آر ٹسٹ کرنے کے ہدف کے ساتھ کام کریں۔ مثبت تشخیص کے بعد، متاثرین کے نمونے جینوم کی جانچ کے لئےگاندھی اسپتال کے سی ڈی ایف ڈی کو روانہ کریں۔ راج نرسمہا نے محکمہ میڈیکل اینڈ ہیلتھ کے سکریٹری کو روزانہ شام 4 بجے سے پہلے کورونا ہیلتھ بلیٹن جاری کرنے کی ہدایت دی ہے۔