تلنگانہ میں رائے دہی بحیثیت مجموعی پر امن

حیدر آباد ۔ 30 نومبر (یواین آئی) تلنگانہ میں چند واقعات کے ماسوا رائے دہی بہ حیثیت مجموعی پر امن رہی۔ ماؤنوازوں سے متاثرہ علاقوں کے حلقوں میں شام بجے رائے دہی کا اختتام عمل میں آیا جب کہ 106 اسمبلی حلقوں میں رائے دہی شام 5 بجے اختتام کو پہنچی۔ حکام نے 5 بجے قطار میں شہرے افراد کو بھی حق رائے دہی سے استفادہ کا موقع دیا۔ شہری علاقوں کے بر خلاف دیہی علاقوں میں رائے دہی کے سلسلہ میں رائے دہندوں کا کافی جوش و خروش دیکھا گیا۔ صبح ہی سے مراکز رائے دہی میں مرد و



خواتین کی طویل قطاریں دیکھی گئیں۔ کئی نوجوان لڑکے لڑکیوں نے بھی اپنے حق رائے دہی سے استفادہ کیا۔ انہوں نے پہلی مرتبہ رائے دہی میں حصہ لینے کے تجربہ کو مثبت قرار دیتے ہوئے جمہوریت کے اس جشن میں پہلی مرتبہ حصہ داری حاصل کرنے پر مسرت کا اظہار کیا۔ اضلاع میں رائے دہی کا فیصد قابل لحاظ رہا جب کہ ریاستی دارالحکومت حیدر آباد میں رائے دہی کے فیصد میں کمی دیکھی گئی۔ ریاست کے بعض مراکز رائے دہی میں الکٹرانک ووٹنگ مشینوں میں خرابی کے سبب رائے دہی میں رکاوٹ بھی درج کی گئی۔