حیفہ میں ہندوستانی فوجیوں کی قربانی کی تاریخ سو سال قبل لکھ دی گئی تھی: مودی

نئی دہلی۔ وزیر اعظم نریندر مودی نے ہندوستان کے دورے پر آئے اسرائیلی وزیر اعظم بنجامن نیتن یاہو کی موجودگی میں تین مورتی چوک کا نام تین مورتی حیفہ چوک کرنے کے اعلان کے موقع پر حیفہ جنگ میں ہندوستانی جوانوں کی قربانی کو یاد کیا۔ ہوائی اڈے پر مسٹر نیتن یاہو کے استقبال کے بعد مسٹر مودی انہیں لے کر براہ راست تین مورتی پہنچے اور ہندوستان اور اسرائیل کی دوستی کو اور مضبوط بنانے کے لئے ایک دوسرے کے تئیں احترام کی علامت پہلی عالمی جنگ کے دوران اسرائیل کے حیفہ شہر کو آزاد کرانے میں اپنی شہادت دینے والے ہندوستانی فوجیوں کو خراج عقیدت پیش کرنے کے ساتھ ساتھ تین مورتی چوک کا نام بدل کر حیفہ چوک ركھنے کا اعلان کیا۔

اسرائیل کے حیفہ شہر کی جنگ میں، ہندوستانی فوجیوں نے عثماني سلطنت اور جرمن فوجیوں سے مقابلہ کرکے انہیں شکست دی۔ اس جنگ میں، ہندوستان کے 44 فوجی شہید ہوئے۔ مودی نے اس موقع پروزیٹر بک میں لکھا: ’’ان صفحات میں سے ایک کو 100 سال پہلے حیفہ میں ہندوستانی فوجیوں کی قربانی کے لئے لکھا جا چکا تھا۔ اس جگہ کا نام تین مورتی حیفہ چوک کیا جانا اس تاریخی موقع کی یادگار ہے ۔ اسرائیل کے وزیر اعظم کی موجودگی میں، ہم بہادر فوجیوں



کو خراج عقیدت پیش کرتے ہیں‘‘۔ انہوں نے مزید لکھا’’ہم بے لوث قربانی اور محنت کی عظیم ہندوستانی روایت کو سلام کرتے ہیں‘‘۔ مسٹر نیتن یاہو نے بھی اس موقع پر ہندوستانی جوانوں کو سلام کرتے ہوئے وزیٹر بک میں ان کی قربانی پر اپنے خیالات کا اظہار کیا۔

نیتن یاہو کے ساتھ ساتھ ان کی بیوی سارہ اور 130 ممبروں کا ایک وفد بھی ہندوستان آیا ہے۔ مسٹر نیتن یاہو کا یہ ہندوستان دورہ وزیر اعظم نریندر مودی کے دورہ اسرائیل کے محض چھ ماہ بعد ہورہا ہے اگرچہ کسی اسرائیلی وزیر اعظم کا یہ 15 سال کے طویل وقفے کے بعد ہندوستان آنا ہو رہا ہے۔ اس سے پہلے، 2003 میں سابق وزیر اعظم ایریل شیرون آئے تھے۔

ہند اور اسرائیل کے درمیان سفارتی تعلقات کے 25 سال پورے ہونے کے موقع پر ہو رہے مسٹر نیتن یاہو کے اس دورے کے موقع پر دونوں ممالک کے درمیان دفاع، زراعت، تجارت، سائبر جرائم کی روک تھام اور پانی کے انتظام جیسے اہم معاہدے ہونے کا امکان ہے۔ اس میں اسرائیل کے ساتھ 430 کروڑ روپے کا براک میزائل سودا سب سے اہم مانا جا رہا ہے۔ یہ توقع ہے کہ اس میزائل کی خریداری سے ہندوستانی بحریہ کی جنگی صلاحیت میں اضافہ ہوگا۔