فلسطین کا دورہ کرنے والے پہلے ہندوستانی وزیر اعظم ہوں گے نریندر مودی ، 10 فروری کو ہوگا دورہ

نئی دہلی : وزیر اعظم نریندر مودی 10 فروری کو فلسطین کو جائیں گے ۔ مودی فلسطین کا دورہ کرنے والے پہلے ہندوستانی وزیر اعظم ہوں گے ۔ وزیر اعظم کا یہ دورہ اسرائیلی وزیر اعظم نتن یاہو کے دورہ ہندوستان کے چند ہفتوں کے ہی بعد ہوگا ۔ خیال رہے کہ فی الحال اسرائیلی وزیر اعظم ہندوستان کے چھ روزہ دورے پر ہیں ۔

وزیر اعظم مودی کا یہ دورہ کافی اہمیت کا حامل سمجھا جارہا ہے کیونکہ اس سے یہ واضح پیغام جائے گا کہ فلسطین کو لے کر ہندوستان کی خارجہ پالیسی میں کوئی تبدیلی نہیں آئی ہے ۔ غور طلب ہے کہ امریکہ کے ذریعہ یروشلم



کو اسرائیل کی راجدھانی اعلان کئے جانے کے بعد ہندوستان نے اقوام متحدہ میں اس کے خلاف ووٹ کیا تھا۔

میڈیا رپورٹس کے مطابق وزیر اعظم مودی عمان سے ہیلی کاپٹر کے ذریعہ رملہ جائیں گے ۔ رملہ یروشلم سے صرف 8 کلو میٹر کی دوری پر ہے اور یہ فلسطین کی انتظامی راجدھانی ہے۔

قابل ذکر ہے کہ گزشتہ سال وزیر اعظم مودی نے اسرائیل کا دورہ کیا تھا ، مگر فلسطین نہیں گئے تھے ، جس کی وجہ سے فلسطین میں ایک منفی تاثر تھا ۔ ایسا کہا جانے لگا تھا کہ فلسطین کے تئیں ہندوستان کی خارجہ پالیسی تبدیل ہوگئی ہے ۔