اندراگاندھی کے یوم پیدائش کی وجہ سےٹیم انڈیاہارگئی: بسواسرما

حیدرآباد: ٹیم انڈیا کو حال ہی میں ورلڈ کپ کے فائنل میچ میں آسٹریلیا کے مقابلے شکست کاسامنا کرناپڑا۔ فائنل میچ کے تعلق سےہر کوئی اپنے اپنے انداز میں اس کا تجزیہ کر رہا ہے۔ سیاسی سطح پربھی تجزیئے پیش کئے جارہے ہیں۔ اب آسام کے چیف منسٹر ہمانتا بسوا سرما نے ٹیم انڈیا کی شکست کی وجہ بتا دی ہے۔ انہوں نے کہا، ورلڈ کپ کا فائنل میچ اندرا گاندھی کی یوم پیدائش پر کھیلا گیا تھا۔ سرما تلنگانہ انتخابات کے دوران چارمینار میں جلسہ عام سے خطاب کررہے تھے۔

انہوں نے الزام لگایا کہ اپوزیشن پارٹیاں وزیر اعظم نریندر مودی کی مخالفت کرنے والوں کے ساتھ ملی بھگت کر رہی ہیں۔ انہوں نے کہا، ہم بی سی سی آئی سے



کہنا چاہتے ہیں کہ مستقبل میں اس بات کو یقینی بنائے کہ فائنل میچ اس دن نہ ہو جس دن نہرو-گاندھی خاندان کا کوئی فرد پیدا ہوا ہو۔ سرما نے کہاکہ اس دن ہندوستان بمقابلہ آسٹریلیا ورلڈ کپ میچ تھا۔ ہم ہر میچ جیت رہے تھے۔ فائنل ہار گئے۔ پھر میں نے دیکھا کہ کون سا دن تھا؟ ہم کیوں ہارے؟ ہم ہندو ہیں اور میں دن کے مطابق حرکت کرتا ہوں۔ میں نے دیکھا کہ ورلڈ کپ کا فائنل ایک ایسے دن کھیلا گیا تھا جو اندرا گاندھی کی یوم پیدائش بھی تھا۔

ہمانتا نے کہا، ورلڈ کپ کا فائنل اندرا گاندھی کی یوم پیدائش پر ملک ہار گیا۔ اس لئے میں بی سی سی آئی سے کہنا چاہتا ہوں کہ اگر آپ کے پاس ورلڈ کپ کا فائنل میچ ہے تو حساب کر لیں۔ اس دن کو گاندھی خاندان کے ساتھ نہ جوڑا جائے، ورنہ ملک کا نقصان ہوگا۔