سونیا گاندھی نے راجستھان سے راجیہ سبھا کے لئے پرچہ نامزدگی داخل کی

ذرائع:

جئے پور:کانگریس لیڈر سونیا گاندھی نے راجستھان سے راجیہ سبھا کے لئے پرچہ نامزدگی داخل کیا ہے۔ آج سونیا اس عمل کو مکمل کرنے راجستھان کے صدرمقام جئے پور پہنچی۔سونیاگاندھی کے ہمراہ راہول گاندھی اور پرینکا گاندھی بھی موجودتھے۔ اس کے علاوہ کانگریس قائدین اور حامیوں کی بھیڑ بھی ان کے ساتھ تھی۔واضح رہےکہ اس وقت سونیاگاندھی اتر پردیش کے رائے بریلی سے لوک سبھا کی رکن ہیں۔

سونیا کی نامزدگی کے بعد راجستھان کے سابق چیف منسٹراشوک گہلوت کا بیان آیا ہے۔ انہوں نے کہاکہ ہم کانگریس پارٹی کی جانب سے راجیہ سبھا امیدوار کے طور پر وزیر اعظم کے عہدے کوچھوڑنے والی شریمتی سونیا گاندھی جی کے اعلان کا تہہ دل سے خیرمقدم کرتے ہیں۔شریمتی سونیا گاندھی کا راجستھان سے گہرا تعلق ہے۔ جب شری راجیو گاندھی وزیر اعظم بنے تو سونیا جی ان کے ساتھ



قبائلی اکثریتی اضلاع کے دورے پر گئیں۔ راجستھان میں خشک سالی کے دوران، وزیر اعظم کے طور پر، راجیو جی نے 3 دن تک خشک سالی سے متاثرہ 9 اضلاع کا دورہ کیا، تب بھی سونیا جی ان کے ساتھ رہیں۔

گہلوت نے مزید کہاکہ میری پہلی میعاد کے دوران، جب مجھے چار بار شدیدخشک سالی کا سامنا کرنا پڑا، سونیا جی نے قحط سے متعلق امدادی کاموں کا جائزہ لینے کے لئے کئی بار کئی اضلاع کا دورہ کیا، جسے راجستھان کے لوگ ابھی تک نہیں بھولے ہیں۔ یو پی اے حکومت کے دوران، سونیا نے، این اے سی کی چیئرپرسن کے طور پر، راجستھان میں ریفائنری، میٹرو جیسے بڑے پروجیکٹوں کو لانے اور مرکز سے تعاون حاصل کرنے میں راجستھان کے مفادات کے تحفظ کے لیے ہمیشہ پرزور وکالت کی۔ آج راجستھان سے راجیہ سبھا کے امیدوار کے طور پر ان کا اعلان پوری ریاست کے لیے خوشی کی بات ہے اور اس اعلان نے تمام پرانی یادیں تازہ کر دی ہیں۔