دیکشت سمیت دیگر رہنماؤں نے راجیو گاندھی کو خراج عقیدت پیش کیا

نئی دہلی،21مئی(ایجنسی) دہلی کانگریس کی صدر اور دہلی کی سابق وزیراعلیٰ شیلا دیکشت اور پارٹی کے دیگر رہنماؤں نے منگل کو سابق وزیر اعظم راجیو گاندھی کو ان کی28 ویں برسی کے موقع پر خراج عقیدت پیش کی۔ 

دہلی کانگریس کمیٹی کے دین دیال اپادھیائےمارگ پر واقع ہیڈکوارٹر راجیو بھون میں اس موقع پر پروگرام کا انعقاد کیا گیا۔ محترمہ دیکشت کے علاوہ دہلی کانگریس کے کارگزار صدر راجیش للوٹھیا اور سابق وزیر کرن والیا اور کئی دیگر قدآور رہنماؤں نے آنجہانی راجیو گاندھی



کو یاد کیا اور خراج عقیدت پیش کی۔ 

سابق وزیراعظم راجیو گاندھی کی برسی کے موقع پر اہم پروگرام کا انعقاد’ویر بھومی‘ پر واقع سمادھی پر ہوا جہاں کانگریس کے صدر راہل گاندھی، ترقی پسند اتحاد(یو پی اے) کی سربراہ سونیا گاندھی، کانگریس کی جنرل سکریٹری پرینکا گاندھی واڈرا، رابرٹ واڈرا، اور سابق وزیراعظم منموہن سنگھ نے خراج عقیدت پیش کی۔ 

21 مئی 1991 کو تملناڈو کے شری پیرمبدور میں انتخابی ریلی کے دوران خود کش بم دھماکے میں مسٹر راجیو گاندھی کا قتل کردیا گیا تھا۔