کشمیر میں ریل خدمات تیسرے دن بھی معطل ، مسافر پریشان

سری نگر ، 12 مئی (یو ا ین آئی) جنوبی کشمیر میں احتجاجیوں کی جانب سے ریل پٹریوں اور سگنل سسٹم کو پہنچائے گئے نقصان کی وجہ سے وادی میں ریل خدمات ہفتہ کو مسلسل تیسرے دن بھی معطل رہیں۔ وادی میں ریل خدمات تین دنوں کی معطلی کے بعد 9 مئی کو بحال کی گئی تھیں۔

ریلوے کے ایک عہدیدار نے یو این آئی کو بتایا ’ ریل پٹریوں اور سگنل سسٹم کی مرمت کا کام جاری ہے۔ جوں ہی یہ کام مکمل ہوگا ریل خدمات کو بحال کردیا جائے گا‘۔ انہوں نے بتایا ’جموں خطہ کے بانہال اور شمالی کشمیر کے بارہمولہ کے درمیان چلنے والی ریل خدمات کو اگلے احکامات تک کے لئے معطل رکھا گیا ہے‘۔

دریں اثنا وادی میں روزانہ کی بنیاد پر



ریل گاڑیوں کے ذریعے سفر کرنے والے ہزاروں مسافروں کو خدمات کی معطلی کی وجہ سے شدید پریشانیوں کا سامنا کرنا پڑرہا ہے۔ کشمیر میں ملک کے دوسرے حصوں کا سفر کرنے والے بیشتر لوگ جموں کے بانہال تک کا سفر ریل گاڑیوں کے ذریعے کرتے ہیں۔

اس کے علاوہ مختلف اضلاع میں تعینات سرکاری اور نجی اداروں کے ملازم بھی اپنی کام کی جگہوں پر پہنچنے کے لئے ریل گاڑیوں کا استعمال کرتے ہیں۔ ایسے سینکڑوں مسافروں کو ہفتہ کی صبح ایک بار پھر ریلوے اسٹیشنوں سے مایوس ہوکر سڑک کا راستہ اختیار کرنا پڑا۔ ریل گاڑیوں کو کشمیر میں آمدورفت کا سستا ذریعہ سمجھا جاتا ہے۔ 

جاری۔ یو این آئی۔ ظ ح بٹ۔ شا پ۔ 0846