دارالحکومت میں ٹریکٹر پریڈ نکالنے پر فیصلہ نہیں

نئی دہلی،21جنوری(یواین آئی) قومی دارالحکومت دہلی میں 26 جنوری کو یوم جمہوریہ کے موقع پر ٹریکٹر پریڈ نکالنے کے سلسلے میں جمعرات کو کسان تنظیموں اور پولیس کے درمیان کوئی فیصلہ نہیں ہوسکا کسان زرعی اصلاحات قانونوں کو منسوخ کرنے اور فصلوں کے کم از کم امدادی قیمت کو قانونی درجہ دینے کے مطالبے کے سلسلے میں دہلی کی سرحدوں پر پچھلے 57 دنوں سے تحریک کررہے ہیں اور یوم جمہوریہ کے دن دارالحکومت آؤٹر رنگ روڈ پر ٹریکٹر پریڈ نکالنے پربضد ہیں۔

میٹنگ کے بعد کسان رہنماؤں نے کہا کہ



پولیس نے انہیں یوم جہوریہ کی وجہ سے دارالحکومت میں گھسنے سے منع کیا ہے جبکہ وہ دہلی میں ریلی نکالنا چاہتے ہیں۔ پولیس کی جانب سے کسانوں کو کڈلی مانیسر پلول ایکسپریس وے پر ریلی نکالنے کی تجویز دی ہے جسے کسانوں نے ٹھکرا دیا ہے۔

میٹنگ کے بعد کسان رہنما درشن پال نے بتایاکہ دہلی پولیس نے کہا کہ آؤٹر رنگ روڈ پر ٹریکٹر پریڈ کی اجازت دینا مشکل ہے اور حکومت بھی اس کےلئے تیار نہیں ہے لیکن کسانوں نے کہہ دیا ہے کہ وہ رنگ روڈ پر ہی ریلی کریں گے۔ پولیس اور کسانوں کے درمیان پھر کل میٹنگ ہوگی۔