نتیش کمار آج دے سکتے ہیں استعفی،بی جے پی کی تائید سے تشکیل حکومت کاامکان

ذرائع

نئی دہلی:بہار میں ان دنوں سیاسی ہلچل زوروں پرہے۔ ایک طرف نتیش کمار عظیم اتحاد چھوڑنے جا رہے ہیں۔ دوسری جانب ممکنہ نئی کابینہ کی بحث بھی زوروں پر ہے۔ ایسی صورتحال میں اطلاعات ہیں کہ چیف منسٹر نتیش کمار چاہتے ہیں کہ نئی حکومت کی تشکیل میں سشیل مودی کو ایک بار پھر ڈپٹی چیف منسٹر کا عہدہ ملے۔واضح رہے کہ آر جے ڈی کے ساتھ اتحاد سے پہلے جب نتیش کمار بی جے پی کے ساتھ تھے، تب ترکیشور پرساد اور رینو دیوی ڈپٹی چیف منسٹر کے عہدے پر فائزتھے۔ نتیش کمار کے ساتھ ساتھ سشیل مودی نے کئی بار حکومت میں ڈپٹی چیف منسٹر کی ذمہ داری نبھائی ہے۔

اطلاعات کے مطابق72 سالہ نتیش کمار نے آج اتحادی پارٹنر اور لالو یادو کی پارٹی راشٹریہ جنتا دل (آر جے ڈی) کے تمام وزراء کو برطرف کرنے کا فیصلہ



کیا ہے۔ ذرائع نے بتایا کہ اس کے بعد چیف منسٹر کو نئے نائب کی ضرورت ہوگی کیونکہ ان کے موجودہ نائب آر جے ڈی کے تیجسوی یادو کو بھی جانا پڑے گا۔ نتیش کمار بہار میں نیشنل ڈیموکریٹک الائنس (این ڈی اے) میں واپسی کے سلسلے میں وزیر داخلہ امت شاہ اور وزیر اعظم نریندر مودی سے براہ راست بات چیت کر رہے ہیں۔ ذرائع نے بتایا کہ انہیں یہ فیصلہ کرنے کا پورا موقع دیا گیا ہے کہ ان کا نیا نائب کون ہوگا اور انہوں نے سشیل مودی کا انتخاب کیا ہے۔

سشیل مودی بہار کے ڈپٹی چیف منسٹر کے طور پر واپس آنے پر غور کرنے کے لئے تیار ہیں یا نہیں فی الحال یہ اطلاع نہیں ہے۔ جب سشیل مودی بہار کے ڈپٹی چیف منسٹر تھے تو انہیں اکثر اپوزیشن کی طرف سے چیف منسٹر کی حمایت کے عوامی مظاہرے پر نتیش کمار کا آدمی کے طور پر تنقید کا سامنا کرنا پڑا۔