نیتن یاہو۔ سارہ آج جائیں گے تاج محل، یوگی آدتیہ ناتھ کے ساتھ کریں گے لنچ

نئی دہلی۔ چھ روزہ دورے پر ہندوستان آئے اسرائیل کے  وزیراعظم بنجامن نیتن یاہو اپنی اہلیہ سارہ کے ساتھ تاج محل کا دیدار کرنے آج آگرہ جائیں گے۔  اسرائیلی وزیر اعظم صبح 10:20 سے 12:30 بجے تک تاج محل میں ہوں گے۔ اس دوران عام سیاحوں کو تاج محل میں داخلہ کی اجازت نہیں ملے گی۔  اسرائیلی وزیر اعظم کے جانے کے بعد تاج محل کو عام سیاحوں کے لئے کھولا جائے گا۔

نیتن یاہو آگرہ میں تقریبا 4 گھنٹے رہیں گے۔ تاج محل کے دیدار کے بعد ہوٹل میں کچھ دیر تک آرام کریں گے۔ اس کے بعد یوپی کے وزیر اعلیٰ یوگی آدتیہ ناتھ کے ساتھ لنچ کریں گے۔ نیتن یاہو کے تاج محل کے دورے کو لے کر آگرہ  میں سخت سیکورٹی انتظامات کیے گئے ہیں۔خیال رہے کہ ہندوستان اور اسرائیل نے 25سال پرانے اپنے سفارتی رشتوں کو دونوں ملکوں کے عوام



کے روشن مستقبل کو ذہن میں رکھتے ہوئے آگے بڑھانے کےنئے عزم کے ساتھ کل نئی دلی میں باہمی تعاون کے 9معاہدوں پر دستخط کئے تھے جن میں سائبرسیکورٹی ،خلائی ٹکنالوجی ،فضائی خدمات سے لیکر ہومیوپیتھک علاج اور قابل تجدید توانائی کو محفوظ کرنے کے شعبہ میں تعاون کے معاہدے شامل ہیں ۔

وزیر اعظم نریندر مودی اور اسرائیل کے وزیر اعظم بنجامن نیتن یاہو کے مابین یہاں حیدرآباد ہاؤس میں ہوئی دوطرفہ میٹنگ میں یہ فیصلے کئےگئے ۔ میٹنگ میں وزیرخارجہ سشما سوراج ، وزیر دفاع نرملا سیتا رمن ،زراعت وکسانوں کی بہبود کے وزیر رادھاموہن سنگھ، قومی سلامتی کے مشیر اجیت ڈوبھال ،جارجہ سکریٹری ایس جے شنکر ،وزارت خارجہ میں سکریٹری (اقتصادی تعلقات )وجے گوکھلے ،ہندستان میں اسرائیل کے سفیر ڈینئل کارمین موجود تھے۔