کمال مولا مسجد - بھوج شالہ مندرکا ہوگا ASI سروے، مدھیہ پردیش ہائی کورٹ کا حکم

مدھیہ پردیش ہائی کورٹ نے پیر، 11 مارچ کو آرکیالوجیکل سروے آف انڈیا (ASI) کو دھار ضلع میں واقع 11ویں صدی کی متنازعہ بھوج شالا یادگار اور کمال مولا مسجد کا سروے کرنے کا حکم دیا۔

پچھلے سال، ’ہندو فرنٹ فار جسٹس‘ نامی ایک تنظیم نے ہائی کورٹ میں ایک عرضی دائر کی تھی جس میں دعویٰ کیا گیا تھا کہ بھوج شالا یادگار ایک مندر ہے۔ عرضی نے 2003 کے آرکیالوجیکل سروے آف انڈیا کے حکم کو چیلنج کیا، جس میں ہندوؤں کو روزانہ بھوج شالہ میں پوجا کرنے پر پابندی تھی۔

اس کے بعد انڈور بنچ نے ASI، مرکز اور مدھیہ پردیش حکومت کو نوٹس جاری کرکے اس معاملے پر ان سے جواب طلب کیا۔

بھوج شالہ 11 ویں صدی کی ASI سے محفوظ یادگار ہے جس کے بارے میں ہندو دعویٰ کرتے ہیں کہ وہ واگ دیوی (سرسوتی) کا مندر ہے، جبکہ مسلم کمیونٹی اسے کمال مولا مسجد کے طور پر مانتی ہے۔

7 اپریل 2003 کو ASI کی طرف سے کئے گئے انتظامات کے مطابق، ہندو ہر منگل کو احاطے میں پوجا کرتے



ہیں، جبکہ مسلمان جمعہ کے دن احاطے میں نماز ادا کرتے ہیں۔

پٹیشن میں دعویٰ کیا گیا کہ آئین ہند کے آرٹیکل 25 کے تحت صرف ہندو برادری کے ارکان کو سرسوتی سدن کے احاطے میں دیوی واگ کی پوجا اور رسومات ادا کرنے کا بنیادی حق حاصل ہے۔

اس میں مزید کہا گیا کہ مسلم کمیونٹی کے ارکان کو مذکورہ جائیداد کے کسی بھی حصے کو کسی مذہبی مقاصد کے لیے استعمال کرنے کا کوئی حق نہیں ہے۔

عرضی گزار نے عدالت سے یہ بھی استدعا کی کہ مرکز کو ہدایت دی جائے کہ سرسوتی دیوی کی مورتی کو لندن کے میوزیم سے واپس لایا جائے اور اسے بھوج شالا کمپلیکس میں دوبارہ قائم کیا جائے۔

درخواست میں کہا گیا ہے کہ دھار کے اس وقت کے حکمرانوں نے 1034 عیسوی میں بھوج شالہ میں مقدس مجسمہ نصب کیا تھا اور اسے انگریز 1857 میں لندن لے گئے تھے۔

عرضی گزاروں میں سے ایک آشیش گوئل نے کہا، ’’اب ہم نے اپنے مذہبی مقام پر دوبارہ دعویٰ کرنے کے لیے قانونی لڑائی شروع کر دی ہے۔ عدالت نے ہماری درخواست کو جامع پایا اور نوٹس جاری کیا۔