ایوانکا ٹرمپ کا دورہ حیدرآباد: مادھاپور میں تیاریاں زور شور سے

حیدرآباد/21نومبر(ایجنسی) شہر حیدرآباد کا مادھاپور علاقہ ان دنوں چھوٹے ہندوستان کا منظر پیش کر رہا ہے کیونکہ 28نومبر کو حیدرآباد انٹرنیشنل کنونشن سنٹر مادھاپور میں ہونے والی تین روزہ گلوبل انٹر پرینر شپ سمٹ کے لئے اس علاقہ کو بڑے پیمانہ پر سجایا گیا ہے اور گزشتہ چند دنوں سے اس میں بڑ ے پیمانہ پر تبدیلی کی گئی ہے۔

اس سمٹ میں صدر امریکہ ڈونالڈ ٹرمپ کی



دختر ایوانکا ٹرمپ حصہ لے رہی ہیں۔ اس علاقہ کی آئی ٹی راہداری دیکھنے لائق ہے جہاں تہوار جیسا منظردیکھا جا رہا ہے ۔ رنگوں کے ذریعہ پورے علاقہ میں خوب صورت مصوری کا کام کیا گیا ہے ،ساتھ ہی حکام کی جانب سے انٹرنیشنل کنونشن سنٹر مادھاپور کے اطراف کے علاقہ میں سڑکوں کی مرمت ،نئے فٹ پاتھس بچھانے ، ڈیوائیڈرس کو رنگ کرنے کا کام بھی مکمل کرلیا گیا ہے۔اصل مرکز توجہ گچی باولی اسٹیڈیم کا فلائی اوور ہے جہاں پرندوں کی مصوری کا کام کیا گیا ہے جس سے یقیناً اس سمٹ میں آنے والوں کی توجہ اس جانب مبذول ہوسکے گی۔