ورلڈکپ فائنل میچ لکھنو میں ہوتاتو ہندوستان جیت جاتا: اکھلیش یادو

اٹاوہ: احمد آباد کے نریندر مودی اسٹیڈیم میں کھیلے گئے ورلڈ کپ فائنل میں ٹیم انڈیا کی شکست سے ملک کا ہر کرکٹ شائق مایوس نظر آرہا ہے۔ وہیں دوسری طرف کرکٹ کے میدان میں شکست کی بحث سیاسی میدان میں بھی تیز ہوگئی ہے۔ منگل کو سماج وادی پارٹی کے صدر اور یوپی کے سابق چیف منسٹر اکھلیش یادو نے طنزیہ انداز میں سیاسی تجزیہ کیا۔ انہوں نے ٹیم انڈیا کی شکست کی وجہ بتائی ہے۔ ان کی بات سن کر سب حیران ہیں۔

 اکھلیش یادو نے کہا کہ اگر گجرات میں ہونے والا میچ (ورلڈ کپ 2023 کا فائنل) لکھنؤ میں ہوتا تو انہیں (ٹیم انڈیا) کو بہت سے لوگوں کا آشیرواد



حاصل ہوتا۔

اکھلیش نے مزید کہا کہ اگر یہ میچ یہاں (لکھنؤ) میں ہوتا تو ٹیم انڈیا کو بھگوان وشنو اور اٹل بہاری واجپائی کا آشیرواد حاصل ہوتا اور ہندوستان جیت جاتا۔ اب سننے میں آرہا ہے کہ وہاں کی پچ میں کچھ خرابی تھی۔ لوگوں نے جو تیاریاں کی تھیں وہ بھی ادھوری رہ گئیں۔ اکھلیش نے یہ بھی دلیل دی کہ لکھنؤ کے اسٹیڈیم کا نام پہلے ایکنا تھا۔ یہ بھگوان وشنو کا نام ہے۔ اب بی جے پی والوں نے اٹل بہاری واجپائی کے نام پر کیا ہے۔ اگر یہ میچ لکھنؤ میں ہوتا تو ہمیں بھگوان کے ساتھ ساتھ اٹل بہاری واجپائی کا آشیروادملتا اور ہندوستان جیت جاتا۔ اکھلیش منگل کو ایک پروگرام میں شرکت کے لیے اٹاوہ آئے تھے۔