ہندستان نے یوکرین پر روس کے مسودہ کی قرارداد پر یو این ایس سی میں حصہ نہیں لیا

اقوام متحدہ /نئی دہلی، 24مارچ (یو این آئی) ہندستان نے یوکرین میں انسانی صورتحال پر اقوام متحدہ سلامتی کونسل (یو این ایس سی) میں روس کی طرف سے بدھ کو پیش کئے گئے ایک مسودہ کی قرارداد پرہوئی ووٹنگ میں حصہ نہیں لیا۔

روس اور چین نے تجویز کے حق میں ووٹ دیا جبکہ ہندستان متحدہ عرب امارات کے ساتھ 13 ممالک میں شامل تھا جنہوں نے حصہ نہیں لیا۔ اس کی وجہ سے قرارداد کا مسودہ منظور نہیں ہوسکا۔

روس کی طرف سے مسودہ قرارداد کو شام، شمالی کوریا اور بیلاروس کی طرف سے اسپانسر کیا گیا تھا۔ یہ اپنائے جانے میں ناکام رہا کیونکہ اسے منظور ہونے



کے لئے درکار نو مثبت ووٹ نہیں ملے۔

چین واحد ملک تھا جو روس کی تیارکردہ قرارداد کے حق میں دینے کے لئے تیار تھا۔ قرارداد میں روس کو یوکرین کے انسانی بحران کا ذمہ دار نہیں ٹھہرایا گیا۔ اقوام متحدہ میں روس کے نمائندے نے کہاکہ ماسکو کی قرارداد کے مسود ے میں جنگ بندی اور یوکرین میں انسانی بحران سے نمٹنے کیلئے اہم عنصر شامل تھے۔انہوں نے کونسل کے وفود پر سیاسی اسباب سے ووٹ دینے سے انکار کرنے کاالزام لگایا۔ روسی نمائندے نے یوکرین کو انسانی بنیاد پر مدد فراہم کرنے کے بجائے انسانی مسئلہ پر سیاست کرنے پر امریکہ اور برطانیہ کی سخت تنقید کی۔