حکومت اپوزیشن کی گزارش کو مسلسل نظر انداز کررہی ہے: ملکارجن کھڑگے

نئی دہلی، 7دسمبر (یو این آئی) کانگریس اور دیگر تمام اپوزیشن جماعتوں نے راجیہ سبھا میں کارروائی نہ چلنے دینے کے لیے حکومت کو ذمہ دار ٹھہراتے ہوئے کہا کہ حزب اختلاف کے ارکان کو ضابطے کے تحت معطل نہیں کیا گیا ہے، اس لیے ان کی معطلی فوری طور پر واپس لی جائے راجیہ سبھا میں اپوزیشن لیڈر ملکارجن کھڑگے نے منگل کو یہاں پارلیمنٹ کے احاطہ میں نامہ نگاروں سے کہاکہ جس واقعہ کے لیے ارکان کو معطل کیا گیا وہ 11 اگست کو پیش آیا تھا لیکن حکومت نے غیر قانونی طریقے سے ارکان کو اگلے سیشن میں معطل کیا ۔ جب کہ ضابطہ یہ کہتا ہے کہ ایوان کے غیر معینہ مدت کے لیے ملتوی ہونے کے بعد پچھلے سیشن کی سرگرمیوں کے سلسلے میں



ارکان کو اگلے سیشن میں معطل نہیں کیا جاسکتا ۔

انہوں نے کہا کہ چیئر مین سے مسلسل گزارش کررہے ہیں کہ ان ارکان کی معطلی غلط ہے اور معطل کیے گئے 12 ارکان کی معطلی منسوخ کی جائے لیکن وہ ایسا کرنے کے لیے بالکل تیار نہیں ہیں۔ ہر گھنٹے ایوان ملتوی ہورہا ہے۔ حکومت نہ تو ایوان کو نہیں چلانا چاہتی ہے اورنہ ہی سماجی مسائل پر بحث چاہتی ہے۔ اسی لیے اپوزیشن کی گزارش کو مسلسل نظر انداز کررہی ہے۔

کانگریس لیڈر نے کہا کہ اگر حکومت معطلی واپس نہیں لیتی ہے تو جہاں یہ ارکان دھرنے پر بیٹھے ہیں، وہاں ان کی پارٹی کے ارکان بھوک ہڑتال کریں گے۔ انہوں نے لوک سبھا میں پارٹی کے ارکان سے بھی اس بھوک ہڑتال میں شامل ہونے کی گزارش کی ہے۔