گیئرٹ ولڈرز کا سابق دست راست جورم مشرف بہ اسلام

ہیگ/6فروری(ایجنسی) ہالینڈ کے اسلام مخالف سیاستداں Geert Wilders گیئرٹ ولڈرز کے دیرینہ ساتھی اور سابق دست راست Joram van Klaveren جورم وان کلیویرن نے اسلام قبول کرلیا ہے۔ ان کے اس انکشاف پر ہالینڈ میں بہت سے حلقے حیران ہیں۔ ہالینڈ میڈیا میں آج شائع ہونے والی رپورٹس میں کہا گیا ہے کہ ڈچ پارلیمان کے دائیں بازو کےسابق رکن اور ماضی میں گیئرٹ ولڈرز کے دست راست سمجھنے جانے والے سیاستداں جورم وان کلیویرین نے اسلام قبول کرنے کاانکشاف کیا ہے۔



وانکلیویرین ‘ ڈچ پارلیمان کے ایوان زیریں میں گیئرٹ والڈرز کی سیاستی جماعت فریڈم پارٹی کے 7 سال تک رکن رہے تھے اور اس دوران انہوں نے سیاسی سطح پر ایک  مذہب کے طور پر اسلام پر سخت تنقید کرتے ہوئے اس کی ہر ممکنہ حوالے سے مخالفت کی تھی۔ اس عرصہ کے دوران اپنے نہایت سخت گیر موقف کے حق میں دلائل دیتے ہوئے وان کلیویرن نے بیسیوں بار مطالبہ کیا تھا کہ ہالینڈ میں برقعہ اور مساجد کے میناروں پر پابندی عائد کی جائے۔ انہوں نے یہاں تک کہہ دیا تھا ‘ہم (اپنے ملک میں) کوئی اسلام نہیں چاہتے‘ جرمن خبررساں ادارہ ڈی ڈبلیو کی رپورٹ کے مطابق 40 سالہ جورم وان کلیویرین نے کہا ہے کہ وہ اسلام کے خلاف ایک کتاب لکھ رہے تھے کہ اس عمل کے دوران ان کا ذہن ہی بدل گیا۔ پھر جو کچھ انہوں نے لکھا‘ وہ ان اعتراضات کی تردید اور وجوہات تھے۔ جورم وان کلیویرن نے اخبار کو یہ بتایاکہ انہوں نے گزشتہ برس 26 اکتوبر کو باقاعدہ طور پر اسلام قبول کرلیا تھا۔