کانگریس نے کیا مدھیہ پردیش اسمبلی انتخابات کے لیے منشور جاری

بھوپال: مدھیہ پردیش کانگریس کے صدر کمل ناتھ نے منگل کو آنے والے ریاستی اسمبلی انتخابات کے لیے پارٹی کا منشور جاری کیا، جس میں مدھیہ پردیش کے تمام شہریوں کے لیے 25 لاکھ روپے کا ہیلتھ انشورنس، او بی سی کے لیے 27 فیصد ریزرویشن سمیت کئی وعدے کیے گئے۔ 

اپوزیشن کانگریس نے اپنے 106 صفحات پر مشتمل منشور میں 59 وعدے درج کیے ہیں جن میں کسانوں، خواتین اور سرکاری ملازمین سمیت سماج کے تمام طبقات کے لیے یقین دہانیاں کی گئی ہیں۔

کمل ناتھ نے منشور کو جاری کرتے ہوئے کہا، ’’ہم تمام لوگوں کے لیے 25 لاکھ روپے



کا ہیلتھ انشورنس کور فراہم کریں گے، جس میں 10 لاکھ روپے کا حادثاتی کور بھی ہے۔

انہوں نے کہا کہ مدھیہ پردیش میں ریاست کی انڈین پریمیئر لیگ (آئی پی ایل) ٹیم بھی ہوگی۔

کمل ناتھ نے 2 لاکھ روپے تک کے زرعی قرضوں کی معافی اور خواتین کو ماہانہ 1500 روپے کی امداد کا بھی اعلان کیا۔

انہوں نے 500 روپے میں ایل پی جی سلنڈر فراہم کرنے، اسکول کی تعلیم مفت کرنے، اولڈ پنشن اسکیم کے نفاذ اور نوجوانوں کو دو سال تک 1500 روپے سے 3000 روپے ماہانہ تک بے روزگاری الاؤنس دینے کا بھی وعدہ کیا۔

230 رکنی ریاستی اسمبلی کے انتخابات 17 نومبر کو ہونے والے ہیں۔