سابق گورنرستیہ پال ملک کےٹھکانوں پر سی بی آئی کے چھاپے

ذرائع:

نئی دہلی:سی بی آئی نےجموں و کشمیر کے کشتواڑ میں 2019 میں کیرو ہائیڈرو پاور پروجیکٹ میں 2,200 کروڑ روپئے کی بدعنوانی کے معاملے میں سابق گورنر ستیہ پال ملک کے ٹھکانوں سمیت 30 سے ​​زیادہ مقامات پر چھاپے مارے۔واضح رہےکہ اس پروجیکٹ میں بدعنوانی کا مسئلہ جموں و کشمیر کے سابق گورنر ستیہ پال ملک نے اٹھایا تھا۔

ستیہ پال ملک، جو 23 اگست 2018 سے 30 اکتوبر 2019 کے درمیان جموں و کشمیر کے گورنر تھے، نے دعویٰ کیا تھا کہ انہیں دو فائلوں کوکلئر کرنے کے لئے 300 کروڑ روپئے کی رشوت کی پیشکش کی گئی تھی۔ اس کے بعد سی بی آئی نے گزشتہ سال اپریل میں مقدمہ درج کیا تھا۔

اس معاملے میں، تحقیقاتی ایجنسی نے



گزشتہ تین مواقع پر کئی افسران اور افراد سے منسلک ٹھکانوں کی تلاشی لی تھی۔ کیس درج کرنے کے بعد، سی بی آئی نے گزشتہ سال اپریل میں 10 مقامات پر اور جون 2022 میں 16 مقامات پر تلاشی لی۔ اس سال مئی میں بھی 12 مقامات پر تلاشی لی گئی۔

سی بی آئی نے پہلے کہا تھاکہ کیرو ہائیڈرو الیکٹرک پاور پروجیکٹ (ایچ ای پی) کے تقریباً 2,200 کروڑ روپئے کے سول ورکس کا ٹھیکہ ایک نجی کمپنی کو دینے میں بدعنوانی کے الزام میں 2019 میں ایک کیس درج کیا گیا تھا۔

ایجنسی نے چناب ویلی پاور پروجیکٹس (پی) لمیٹڈ کے سابق چیئرمین نوین کمار چودھری اور دیگر سابق عہدیداروں ایم ایس بابو، ایم کے متل اور ارون کمار مشرا اور پٹیل انجینئرنگ لمیٹڈ کے خلاف مقدمہ درج کیا ہے۔