بی جے پی پورے ملک میں فسادات کروا رہی ہے: اے اے پی

نئی دہلی، 20 اپریل (یو این آئی) بی جے پی پر پورے ملک میں فسادات کرانے کا الزام لگاتے ہوئے عام آدمی پارٹی (آپ) نے بدھ کو کہا کہ بھارتیہ جنتا پارٹی (بی جے پی) کے ہیڈکوارٹر پر بلڈوزر پورے ملک کے فسادات کو روک دے گا اے اے پی کے ترجمان اور ایم ایل اے آتشی نے ٹویٹ کیاکہ "پورے ملک میں فسادات ہو رہے ہیں۔ ہر طرف غنڈہ گردی اور بدمعاشیاں کی جارہی ہیں۔ بی جے پی یہ سارے فسادات کروا رہی ہے۔ ہم گارنٹی دیتے ہیں بی جے پی



ہیڈکوارٹر پر بلڈوزر چلائے جائیں گے، پورے ملک میں فسادات بند ہوجائیں گے۔‘‘

وزیر داخلہ امیت شاہ پر پورے ملک میں فسادات اور تشدد پھیلانے کا الزام لگاتے ہوئے انہوں نے کہا کہ ان کے گھر پر بلڈوزر چلایا جانا چاہئے تاکہ پورے ملک میں فسادات رک سکیں۔

محترمہ آتشی نے کہا کہ آج جہانگیر پوری میں تجاوزات ہٹانے کی بات کیوں کی گئی، جب کارپوریشن میں پندرہ سال سے بی جے پی کی حکومت ہے تو پھر یہ کارروائی کیوں نہیں کی گئی۔