انصاف کو کچلنے کی کوشش کامیاب نہیں ہونے دیں گے: پرینکا

بارہ بنکی، 23اکتوبر (یو این آئی) اترپردیش کی سیاست میں کانگریس کو حاشیہ سے نکال کر اقتدار کی دہلیز پر لے جانے کا حوصلہ دکھانے والی کانگریس کی جنرل سکریٹری پرینکا گاندھی و اڈرا نے سنیچر کو یوگی حکومت پر کسانوں کو ہراساں کرنے کا الزام لگاتے ہوئے کہاکہ انصاف کو کچلنے کی حکومت کی کوشش کامیاب نہیں ہونے دی جائے گی۔

بارہ بنکی کے ہرکھ بازار سے پارٹی کی پرتگیا یاترا کو روانہ کرنے سے پہلے محترمہ واڈرا نے کہاکہ انصاف کو کچلنے کی سرکاری کوششو ں کو کامیاب نہیں ہونے دیا جائیگا۔ کسانوں ہراساں کرنا قبول نہیں کیا جاسکتا جس طرح لکھیم پور میں مرکزی وزیر مملکت کے بیٹے نے کسانوں پر گاڑی چڑھاکر قتل کیا، اس کو دبانے کی ریاستی حکومت نے کوشش کی، وہ انصاف کو کچلنے کی پالیسی



تھی، جس کی مخالفت کرنے پر انہیں حراست میں لیا گیا۔

انہوں نے کہاکہ سرکاری خریداری مراکز پر کسانوں کے بدسلوکی اس حکومت نے کی، کسانوں کی پیداوار کو محدود مقدار میں خریدا گیا، دھان کی خریداری میں بدانتظامی کے سبب لکھیم پور کے ایک کسان کو منڈی میں پڑے اپنے دھان میں آگ لگانی پڑی جبکہ کھاد کی تقسیم میں بدانتظامی کے سبب للت پور کے ایک کسان کی کھاد تقسیم مرکز میں لائن میں کھڑے کھڑے موت ہوگئی۔ ملازمت مانگنے والے بے روزگاروں پر بی جے پی حکومت لاٹھیں چلواتی ہے، منتخب امیدوار جوائننگ کے لئے تحریک کررہے ہیں پر اس حکومت میں کوئی سنائی نہیں ہوتی، سماج کا ہر طبقہ پریشان ہے، کانگریس متاثرین کے ساتھ کھڑی ہے اور ان کو انصاف ملے یہی ہماری کوشش ہے جس کے لئے ہر جدوجہد کے لئے تیار ہوں۔