علی گڑھ مسلم یونیورسٹی نے اپنی مرضی سے چھوڑاتھا اقلیتی درجہ، مرکز نے سپریم کورٹ میں اپنا موقف پیش کیا

ذرائع:

نئی دہلی:مرکزی حکومت نے منگل کو سپریم کورٹ میں علی گڑھ مسلم یونیورسٹی (اے ایم یو) کو اقلیتی درجہ دینے کی مخالفت کرتے ہوئے کہا کہ 1920 میں اس کی تشکیل کے وقت اے ایم یو نے اپنی مرضی سے اقلیتی درجہ چھوڑ دیا تھا۔ مرکز نے کہا کہ اگر اے ایم یو چاہتی تو وہ اپنی اقلیتی حیثیت کو برقرار رکھ سکتی تھی اور امپیریل ایکٹ (برطانوی پارلیمنٹ کا ایک قانون) کے تحت شرائط کو قبول کرکے قانون کے ذریعے علی گڑھ مسلم یونیورسٹی بن سکتی تھی۔

سالیسٹر جنرل تشار مہتا نے مرکزی حکومت کی جانب سے پیش ہوتے ہوئے کہا کہ بہت سے اداروں نے ایسا کیا ہے اور اپنی اقلیتی حیثیت کو برقرار رکھا ہے، جیسے کہ دہلی کے سینٹ سٹیفن کالج اور جامعہ ملیہ اسلامیہ۔

سپریم کورٹ کی سات ججوں کی آئینی بنچ اس وقت علی گڑھ مسلم یونیورسٹی کی اقلیتی حیثیت کی سماعت کر رہی ہے۔ اے ایم یو اور دیگر درخواست گزاروں نے الہ آباد ہائی کورٹ کے 2006 کے فیصلے کو سپریم کورٹ میں چیلنج کیاتھا، جس میں ہائی کورٹ نے عزیز باشا کے فیصلے پر بھروسہ کرتے ہوئے کہا تھا کہ اے ایم یو اقلیتی ادارہ نہیں ہے اور مسلم طلباء کے لئے 50 فیصد ریزرویشن کو منسوخ کر دیا گیا تھا۔ اتنا ہی نہیں، ہائی کورٹ نے عزیز باشا کے فیصلے کے بعد اے ایم یو کی اقلیتی حیثیت کو بحال کرنے کے لئے 1981 میں اے ایم یو ایکٹ میں کی گئی ترمیم کی تین دفعات کو یہ کہتے ہوئے منسوخ کر دیا تھا کہ عدالت کے فیصلے کو غیر موثر قرار دیا گیا ہے۔

منگل کو، مرکز کی نمائندگی کرتے ہوئے، سالیسٹر جنرل تشار مہتا نے کہا کہ اے ایم یو کا قیام



برطانوی دور میں 1920 میں ایک قانون کے ذریعے کیا گیا تھا۔ برطانوی دور میں یونیورسٹی میں اعلیٰ تعلیم کا انتظام برطانوی پارلیمانی پالیسی کے مطابق ہوتا تھا۔ جس میں کسی بھی یونیورسٹی کے لیے شرط یہ تھی کہ وہ غیر فرقہ وارانہ نوعیت کی ہو گی اور اس پر حکومت کا مکمل کنٹرول ہو گا۔ مہتا نے کہا کہ اس وقت جو یونیورسٹیاں برطانوی دور کے قانون کے تحت قائم کی گئی تھیں ان کو ان دونوں شرائط پر عمل کرنا پڑتا تھا۔

ایسے میں برطانوی قانون کے تحت یونیورسٹی بننے سے پہلے کسی ادارے کی جو بھی نوعیت تھی، وہ فطرت قانون کے بعد بدل جاتی ہے۔ 1920 میں، اے ایم یو نے برطانوی قانون کے تحت یونیورسٹی بننا قبول کیا تھا اور ان دونوں شرائط کو بھی قبول کیا تھا، اس لئے 1920 کے اے ایم یو ایکٹ کے مطابق، یہ اقلیتی یونیورسٹی نہیں تھی۔ اے ایم یو نے رضاکارانہ طور پر اپنی اقلیتی حیثیت ترک کر دی تھی اور برطانوی قانون کے تحت یونیورسٹی بننے اور سرکاری امداد حاصل کرنے کو قبول کر لیا تھا۔ مہتا نے کہا کہ اگر اے ایم یو چاہتا تو یہ دیگر اداروں کی طرح اقلیتی ادارہ رہ سکتا تھا۔

اس سلسلے میں انہوں نے ملک بھر میں اس وقت کے کئی اداروں کی مثالیں اور فہرستیں پیش کیں۔ مہتا نے کہا کہ اس وقت اے ایم یو الہ آباد یونیورسٹی سے الحاق شدہ تھی، اگر وہ چاہتی تو اپنی اقلیتی حیثیت کو برقرار رکھتی اور الہ آباد یونیورسٹی سے وابستہ رہتی، جس طرح سینٹ سٹیفن کالج دہلی یونیورسٹی سے منسلک ہے۔ انہوں نے کہا کہ درخواست گزاروں کے یہ دلائل کہ قانون کے تحت یونیورسٹی نہ بنتی تو ان کی ڈگریوں کو تسلیم نہیں کیا جاتا، غلط ہے۔