افغانستان نے بھارت میں سفارت خانہ مستقل طور پر بند کرنے کا کر دیا اعلان

جمعہ کو مشن کی جانب سے اعلان کردہ ایک بیان میں کہا گیا ہے کہ 23 نومبر سے افغانستان کا سفارت خانہ مستقل طور پر بند ہو گیا ہے۔ سفارت خانے نے کابل میں طالبان حکمرانوں کے ساتھ ساتھ حکومت ہند دونوں پر الزام لگایا کہ وہ ہندوستان میں مستقل طور پر کارروائیاں بند کرنے کے لیے دباؤ ڈال رہے ہیں۔ سفارتخانے نے 30 ستمبر کو کام کرنا بند کر دیا تھا جب سینئر افغان سفارت کار اور اسلامی جمہوریہ افغانستان کی حکومت کی نمائندگی کرنے والے سفیر نے ہندوستان چھوڑ دیا تھا۔

"بدقسمتی سے، آٹھ ہفتوں کے انتظار کے باوجود، سفارت کاروں کے لیے ویزا میں توسیع اور حکومت ہند کے طرز عمل میں تبدیلی کے مقاصد کو پورا نہیں کیا گیا۔ طالبان اور ہندوستانی حکومت دونوں کی جانب سے کنٹرول چھوڑنے کے لیے مسلسل دباؤ کے پیش نظر، سفارت



خانے کو ایک مشکل انتخاب کا سامنا کرنا پڑا،" مشن کے ایک سرکاری بیان میں کہا گیا۔

تاہم، بیان میں یہ بھی تسلیم کیا گیا ہے کہ جائیداد بھارت کے حوالے کرنا "افغانستان کے بہترین مفاد" میں ہے۔ مشن نے کہا کہ اب یہ ہندوستانی حکام پر ہے کہ وہ افغان سفارت خانے کے مستقبل کے لائحہ عمل کا فیصلہ کریں۔ سرکاری اعلامیہ میں بتایا گیا کہ "اسلامی جمہوریہ افغانستان کی طرف سے تعینات سفارت کاروں کی ذمہ داری باضابطہ طور پر ختم ہو گئی ہے۔"

بیان میں مزید الزام لگایا گیا ہے کہ کچھ افغان سفارت کار ہیں جو کابل میں طالبان کی تنظیم سے وابستہ ہیں جنہوں نے ہندوستان میں افغان سفارت کاروں کی شبیہ کو "داغدار" کرنے کی کوشش کی ہے۔ اسلامی جمہوریہ افغانستان کے سفارت خانے کی مستقل بندش کے بعد افغانستان میں طالبان سے پہلے کی حکومت کی سفارتی موجودگی ختم ہو گئی ہے۔